„შეცვალეს“ წევრებმა „ქართული ოცნების“ წევრებს სათამაშო პანდა მიუტანეს

„ქართული ოცნების“ ცენტრალურ ოფისთან მოძრაობა „შეცვალეს“ წარმომადგენლებმა „ტროლებისა“ „ბოტების“ საწინააღმდეგო აქცია-პერფორმანსი გამართეს.

მოძრაობის წევრებს სიმბოლურად პანდის ნიღბები ეკეთათ, რითაც მათი თქმით, მუსიკალურ ჯგუფ “პანდას” მიერ სოციალურ ქსელ “facebook”-ში ყალბი გვერდების მართვა გააპროტესტეს.

ამასთან, „შეცვალეს” წევრებმა “ქართული ოცნების” ცენტრალური ოფისის კედლებსა და ფანჯრებზე მიაკრეს ბიძინა ივანიშვილის და გიორგი გახარიას სახის გამოსახულებით პანდას სტიკერები.

გარდა ამისა, მოძრაობის წევრებს “ქართული ოცნების” ოფისთან სათამაშო პანდაც ჰქონდათ მიტანილი, რისი დატოვებაც მმართველი პარტიის ოფისში სურდათ, მაგრამ სამართალდამცავებმა მათ ამის საშუალება არ მისცეს.

„ბოლო 2 დღის აქტუალური თემაა, რომ “facebook”-მა ყველანაირი „ბოტი“ დაუბლოკა ხელისუფლებას, რომელსაც ხელმძღვანელობდა ე.წ. სარეკლამო ჯგუფი “პანდა”. ჩვენ მათ სათამაშო პანდა მოვუტანეთ საჩუქრად, რადგან მათ არანაირი „ბოტი“ და ჯგუფი სოციალურ ქსელში აღარ დარჩათ, შეუძლიათ ამ სათამაშო პანდას ჩაეხუტონ და რაღაც დონეზე საკუთარი თავი დაიმშვიდონ, რომ თითქოსდა ქვეყანაში ყველაფერი კარგად არის“, – განაცხადა მოძრაობა “შეცვალეს” წევრმა გიორგი მსხალაიამ.

www.interpressnews.ge