შეტაკებების ფონზე სირიის ციხიდან ე.წ. ისლამური სახელმწიფოს წევრები გაიქცნენ

სირიის ახალ სამთავრობო ძალებისა და ქურთებით დაკომპლექტებული სირიის დემოკრატიული ძალების (SDF) გასული დღეების შეტაკებების პარალელურად საბრძოლო ზონაში მოხვედრილი ციხიდან ე.წ. ისლამური სახელმწიფოს (ISIS) წევრები გაიქცნენ.

SDF-ის სპიკერის ცნობით, ალ-შადადის ციხიდან გაქცეულია 1 500-მდე პატიმარი. პარალელურად, სირიის არმიაში ირწმუნებიან, რომ გაქცეულია ISIS-ის 120 წევრი და მათ გათავისუფლებაში SDF-ს ადანაშაულებენ. ასევე, სირიის შინაგან საქმეთა სამინისტროში ირწმუნებიან, რომ მათ ოპერაცია ჩაატარეს და 81 პატიმარი ხელახლა დააკავეს. SDF-ში ამბობენ, რომ მათ ციხეზე კონტროლის არმიის იერიშის შედეგად დაკარგეს.

მიუხედავად იმისა, რომ სირიელ ქურთებსა და ახალ მთავრობას შორის 18 იანვარს ცეცხლის შეწყვეტის შეთანხმება გაფორმდა, შეტაკებები 19 იანვარსაც გაგრძელდა.

სირიის არმიამ კონტროლი დაამყარა დეირ-ეზ-ზორისა და რაქას ტერიტორიებზე, სადაც სირიის უდიდესი ნავთობსაბადოები მდებარეობს. ამ დასახლებებს SDF-ი წლების განმავლობაში აკონტროლებდა.

მანამდე, 18 იანვარს, სირიის სახელმწიფო მედიის ინფორმაციით, სამთავრობო ძალებმა ქვეყნის ჩრდილოეთით ქალაქ ტაბქასა და სირიის უდიდეს კაშხალზე კონტროლი დაამყარეს. ტერიტორიას აქამდე ქურთი მებრძოლები აკონტროლებდნენ.

ევფრატის კაშხლის დაკავებამდე, რომელიც რაკის პროვინციაში მდებარეობს, სირიის ძალებმა ალეპოს რეგიონში არაერთი ქალაქი და სოფელი დაიკავეს მას შემდეგ, რაც SDF-ის სარდლობამ განაცხადა, რომ ტერიტორიას დატოვებდა.

SDF-სა და სირიის არმიას შორის შეტაკებები რამდენჯერმე მოხდა მას შემდეგ, რაც პრეზიდენტ აჰმედ ალ-შარაას მთავრობა ხელისუფლებაში მოვიდა.

შარაამ პირობა დადო, რომ 14-წლიანი სამოქალაქო ომის შემდეგ ქვეყანას გააერთიანებდა, თუმცა ქურთები თავიანთი ავტონომიის გარანტიებს ითხოვენ.

SDF-ის მეთაურმა მაზლუმ აბდიმ 16 იანვარს განაცხადა, რომ მისი ძალები შაბათს ალეპოს აღმოსავლეთით მდებარე პოზიციებიდან გასვლას დაიწყებდნენ, რაც უფრო ფართო შეთანხმების ნაწილია, რომელიც გასული წლის მარტში იქნა მიღწეული.

ქურთების ძალების გასვლა რეგიონში აშშ-ს ხელმძღვანელობით მოქმედი საერთაშორისო კოალიციის დელეგაციის ვიზიტს მოჰყვა.

თუმცა, 17 იანვარს ბრძოლები რამდენიმე რეგიონში გაგრძელდა. SDF-ს განცხადებით, მისი ძალები ინტენსიურ შეტაკებებში იყვნენ ჩართულნი სამთავრობო ჯარებთან ტაბქას სამხრეთით, თავრას ნავთობსაბადოს რაიონში, “რაც შეთანხმების ფარგლებს სცდებოდა”.

შეერთებულმა შტატებმა სირიის ჯარებს თავშეკავებისკენ მოუწოდა.