შენობის იერ-სახის დამახინჯება თუ კანონიერი პერფორმანსი – რა გადაწყვეტილება მიიღო სასამართლომ

ოზურგეთის რაიონულმა სასამართლომ დღეს ადგილობრივი მერიის ადმინისტრაციული სამართალდარღვევის ოქმი განიხილა, რომლითაც “ერთიანი ნაციონალური მოძრაობის” წევრები და საკრებულოს დეპუტატები ბესიკ ქათამაძე, დავით მჟავანაძე და თათია ნიკოლაშვილი ოზურგეთის ადმინისტრაციული შენობის იერ-სახის დამახინჯების საფუძვლით 50 ლარის ოდენობის თანხით დაჯარიმდნენ. საქმე ეხება პერფორმანსს, რომლის ფარგლებშიც “ნაციონალური მოძრაობის” წევრებმა მუნიციპალიტეტის ადმინისტრაციული შენობიდან ბანერი შინაარსით “ თავისუფლება მიხეილ სააკაშვილს” გადმოფინეს. დეპუტატები აცხადებენ, რომ ადმინისტრაციული კოდექსის 150-ე მუხლი, რომლის საფუძველზე მერიამ ოქმი შეადგინა, არაკონსტიტუციურია და შესაბამისად, მათი ქმედება კანონს არ გაცდენია. თუმცა მოსამართლემ თორნიკე კაპანაძემ მიიჩნია, რომ ოზურგეთის მერიამ ადმინისტრაციული სამართალდარღვევის ოქმი კანონის დაცვით შეადგინა, “ნაციონალური მოძრაობის” წევრები კანონდამრღვევებად ცნო, თუმცა 50 ლარიანი ჯარიმები სიტყვიერი შენიშვნით შეცვალა. ნაციონალური მოძრაობა აცხადებს რომ გადაწყვეტილება პოლიტიკური საფუძვლით არის მიღებული და მოსამართლემ არაკონსტიტუციური მუხლით იხელმძღვანელა.