საერთაშორისო გამჭვირვალობა საქართველო წერს, რომ თევზჭერის ექსკლუზიური უფლება ფოთში მხოლოდ 5 კომპანიას აქვს, რომელიც ქართულმა ოცნებამ აუქციონის გარეშე 2036 წლამდე გაუგრძელა.
ორგანიზაციის ცნობით, ამ კომპანიების მფლობელებმა მმართველ პარტიას და მის საპრეზიდენტო კანდიდატს ჯამში 1,357,100 ლარი შესწირეს. ამ დახურულ ელიტურ კლუბში ოცნების დეპუტატის, გიორგი ხახუბიას ოჯახს და გავლენიან მილიონერებს შეხვდებით.
ორგანიზაციის განცხადებით, ფოთი “საქართველოსა და რეგიონის ერთ-ერთ უმნიშვნელოვანეს სტრატეგიულ კვანძს წარმოადგენს”, მისი სტრატეგიული მნიშვნელობის გამო კი მისი ეკონომიკური რესურსების განკარგვის პროცესი განსაკუთრებულ გამჭვირვალობასა და კეთილსინდისიერების მაღალ სტანდარტს საჭიროებს
TI-ის ჩატარებული კვლევის ძირითად მიმართულებებსა და მიგნებებს გთავაზობთ უცვლელად:
“ვინ ფლობს ფოთის სტრატეგიულ სიმდიდრეს?
დოკუმენტი მოიცავს ოთხ ძირითად მიმართულებას:
თევზჭერა და შავი ზღვის რესურსების ათვისება: ლიცენზიების განაწილების პრაქტიკა და მმართველი გუნდის დონორი კომპანიების ექსკლუზიური უფლებები;
საზღვაო ინფრასტრუქტურა, პორტები და ტერმინალები: თავისუფალი ინდუსტრიული ზონისა (FEZ) და ტერმინალების მფლობელთა კავშირები მაღალი რანგის პოლიტიკურ ფიგურებთან და ოფშორულ კომპანიებთან;
სამშენებლო და ინფრასტრუქტურული სექტორი: სახელმწიფო შესყიდვები და ინტერესთა შეუთავსებლობის რისკები მმართველ რგოლებში;
კვების პროდუქტების წარმოება: მსხვილი აგრო-სამრეწველო ჯგუფების პრივილეგირებული ურთიერთობა სახელმწიფო ინსტიტუტებთან და საგადასახადო შეღავათები.
1 .ეკონომიკური რესურსების განაწილება ფინანსური და პოლიტიკური ჯგუფების მიხედვით.
კვლევაში წარმოდგენილი მონაცემები შეგვიძლია დავაჯგუფოთ იმ ძირითადი ფინანსური, პოლიტიკური და ნათესაური კავშირების მიხედვით, რომლებიც აკონტროლებენ ქალაქ ფოთის სტრატეგიულ აქტივებს.
ჯგუფი I: დავით წიწილაშვილი, სულხან პაპაშვილი, ხახუბიების ოჯახი და ხვიჩა მაქაცარიასთან დაკავშირებული პირები (თევზჭერა და ლოგისტიკა)
ამ სექტორში ჩამოყალიბებულია ოლიგოპოლიური მდგომარეობა. შავ ზღვაში თევზჭერის სტრატეგიულ ლიცენზიებს 5 კომპანია ფლობს. ამ კომპანიების მფლობელთა მნიშვნელოვანი ნაწილი მმართველი პოლიტიკური ჯგუფის შემწირველია და ყველა მათგანს სახელმწიფომ თევზჭერის ექსკლუზიური ლიცენზიები 2036 წლამდე გაუგრძელა;
თევზჭერის ლიცენზიების მფლობელი კომპანიების წარმომადგენლებმა პოლიტიკური შეწირულებების სახით 1,488,100 ლარი გაიღეს, ყველაზე მეტი – 1,282,000 ლარი მმართველი პარტიას მისცეს;
Loading ...