დღეს მთავრობის კანცელარიაში პრემიერ მინისტრის, გიორგი გახარიას მეთაურობით მორიგი მთავრობის სხდომა გაიმართა, რომელსაც საკოორდინაციო საბჭოს წევრებიც ესწრებოდნენ.
ქვეყანაში კორონავირუსის მზარდი შემთხვევებიდან გამომდინარე მთავრობამ თბილისსა და იმერეთში შემზუდავი ღონისძიებების გამკაცრების გადაწყვეტილება მიიღო. კერძოდ, 22:00 საათიდან იზღუდება რესტორნების და ყველა გასართობი დაწესებულების მუშაობა.
ასევე, საქართველოს მთავრობის გადაწყვეტილებით, აჭარაში კოვიდ-სიტუაციის დასტაბილურების გამო შეზღუდვების ნაწილი მოიხსნა, ნაწილი კი გაგრძელდება. კერძოდ, 19 ოქტომბრიდან აჭარაში საზოგადოებრივი ტრანსპორტი და მათ შორის საქალაქთაშორისო ტრანსპორტი გაიხსნება. გარდა ამისა, აჭარაში ძალაში რჩება ონლაინ რეჟიმში სასწავლო პროცესი. 22 საათიდან კვლავ შეზღუდულია რესტორნებისა და გასართობი დაწესებულებების საქმიანობა.
დღევანდელი მთავრობის სხდომის დასრულების შემდეგ ცნობილი გახდა, რომ უმაღლეს სასწავლებლებში სწავლის დაწყების გადაწყვეტილება არ გადაიხედება და აუდიტორიებს სტუდენტები 19 ოქტომბრიდან დაუბრუნდებიან.
დღესვე, პრემიერმა, გიორგი გახარიამ ოქტომბრის ბოლოდან ავიამიმოსვლის ეტაპობრივი აღდგენა დაანონსა. გახარიამ თქვა, რომ პირველ ეტაპზე არსებული ფრენების – მიუნხენისა და საფრანგეთის მიმართულებით, სიხშირე გაიზრდება. ნოემბრიდან კი ფრენები აღდგება ევროპის მიმართულებით როგორც თბილისის, ასევე ქუთაისის აეროპორტიდან.
მთავრობის მეთაურმა როგორც საჯარო, ისე კერძო დაწესებულებებს მოუწოდა თანამშრომლები მაქსიმალურად დისტანციურ მუშაობაზე გადაიყვანონ. მოქალაქეებს კი მიმართა, რომ პირბადე გამოიყენონ როგორც დახურულ, ისე ღია სივრცეებში, რადგან “დღეს, ქვეყანაში, წესების დაცვა, პირბადის ტარება, ელემენტარული დისციპლინა და კანონების შესრულება, არის პატრიოტიზმი”.
Loading ...
