ღაზის სექტორში 30 იანვარს ჰამასის (აშშ-სა და ევროკავშირში გამოცხადებულია ტერორისტულ დაჯგუფებად) წარმომადგენლებმა გაათავისუფლეს კიდევ რვა მძევალი, რომლებიც 2023 წლის 7 ოქტომბერს ისრაელზე თავდასხმის დროს გაიტაცეს.
„წითელ ჯვარს“ პირველი გადასცეს ისრაელის არმიის 20 წლის სამხედრო აგამ ბერგერი; რამდენიმე საათში სხვა ადგილას, ხან-იუნისში, გაათავისუფლეს სამოქალაქო პირები, 29 წლის არბელ იაჰუდი და 80 წლის გადი მოზესი, მათთან ერთად კი – ტაილანდის ოთხი მოქალაქე.
ისრაელის არმიამ დაადასტურა, რომ მძევლები გაათავისუფლეს.
მათ სანაცვლოდ, ისრაელი საპატიმროდან გაუშვებს 110 პალესტინელს.
ეს მძევლების და პატიმრების მესამე გაცვლაა 17 იანვარს მიღწეული – ცეცხლის შეწყვეტის და მძევლების გათავისუფლების შესახებ – შეთანხმებიდან. წინა ჯერზე ჰამასმა გაუშვა შვიდი ისრაელელი მძევალი.
ბოლო მონაცემებით, 30 იანვრის გათავისუფლების შემდეგ ღაზაში რჩება 82 მძევალი, რომლებიც გაიტაცეს ისრაელზე თავდასხმის დროს.
რამდენიმე ათეული, სავარაუდოდ, მკვდარია.
პირველ ეტაპზე ჰამასმა უნდა გაათავისუფლოს 33 მძევალი, ხოლო ისრაელმა – 2000-მდე პატიმარი.
ისრაელმა ღაზის სექტორში ჰამასის წინააღმდეგ ფართომასშტაბიანი სამხედრო ოპერაცია დაიწყო მას შემდეგ, რაც 2023 წლის 7 ოქტომბერს პალესტინელთა რადიკალური მოძრაობის სამხედრო ფრთის დაჯგუფებები თავს დაესხნენ ისრაელის სამხრეთს, 1200 ადამიანი მოკლეს და 250-ზე მეტი მძევლად აიყვანეს.
პალესტინური მხარის ინფორმაციით, 2023 წლის ოქტომბრიდან ღაზის სექტორში დაღუპულია 46 900-ზე მეტი ადამიანი. ასეულობით ათასი დევნილად იქცა. საომარი მოქმედებების და ბლოკადის გამო სამოქალაქო მოსახლეობა ჰუმანიტარულ კატასტროფაში აღმოჩნდა. გაეროს მონაცემებით, ღაზის სექტორში დანგრეული ან დაზიანებულია სახლების 92%.
2024 წლის ნოემბერში სისხლის სამართლის საერთაშორისო სასამართლომ გასცა ისრაელის პრემიერ-მინისტრის, ბენიამინ ნეთანიაჰუს და თავდაცვის ყოფილი მინისტრის, იოავ გალანტისა და ჰამასის ერთ-ერთი ლიდერის, მოჰამედ დეიფის დაპატიმრების ორდერები. ისინი ეჭვმიტანილი არიან ომის დანაშაულისა და კაცობრიობის წინააღმდეგ დანაშაულის ჩადენაში.
Loading ...
