ქუთაისისა და ბათუმის სახელმწიფო უნივერსიტეტების სტუდენტების ნაწილი გაიფიცა

ბათუმის შოთა რუსთაველის სახელობის სახელმწიფო უნივერსიტეტში საზღვაო აკადემიის სტუდენტები და ბსუ-ს სტუდენტები „უცხოური გავლენის გამჭვირვალობის შესახებ“ კანონპროექტს აპროტესტებენ.

როგორც ორგანიზატორები აცხადებენ, ამ ფორმით სასწავლებლის ადმინისტრაციასა და სტუდენტებს გაფიცვისკენ მოუწოდებენ.

სტუდენტების თქმით, ე.წ. რუსული კანონის მიღებით ევროპაში საქართველო ვერ შევა.

სასწავლებლის დერეფნებში ისმის შეძახილები „გამოდით, ლექტორებო დადექით თქვენი სტუდენტების გვერდით”.

„ყველა აუდიტორიის კარს გავაღებთ და მოვუწოდებთ გამოვიდნენ! დღეს წყდება საქართველოს თავისუფლების ბედი. გამოდით, შემოგვიერთდით!“- ისმის მოწოდებები ბათუმის სახელმწიფო უნივერსიტეტის დერეფნებში.

ასევე გაიფიცა ქუთაისის აკაკი წერეთლის სახელმწიფო უნივერსიტეტის სტუდენტების ნაწილი.

სხვადასხვა ფაკულტეტის სტუდენტებმა დღეს აუდიტორიებში შესვლაზე უარი თქვეს და საყოველთაო პროტესტს შეუერთდნენ. სტუდენტები „უცხოური გავლენის გამჭვირვალობის შესახებ“ კანონპროექტს აპროტესტებენ.

მათი თქმით, აუდიტორიებში არ შევლენ, ვიდრე აღნიშნული კანონპროექტის გაწვევა არ მოხდება.

ახალგაზრდები არ გამორიცხავენ, მათ პროტესტს ადმინისტრაციის თანამშრომლების ნაწილიც შეუერთდეს.

სტუდენტები მსვლელობით მერიის შენობასთან გადასვლას გეგმავენ.