შინაგან საქმეთა სამინისტრო აცხადებს, რომ ქობულეთის პოლიციის თანამშრომლებმა, ჩატარებული საგამოძიებო და საპროცესო მოქმედებების შედეგად, 1997 წელს დაბადებული ნ.ტ. დააკავეს. მამაკაცს ბრალად ედება სექსუალური ხასიათის შეღწევა თექვსმეტი წლის ასაკს მიუღწევლის სხეულში. მისი დაკავება მოსამართლის განჩინების საფუძველზე მოხდა.
„გამოძიებით დადგინდა, რომ ბრალდებულმა ქობულეთის მუნიციპალიტეტში წინასწარი შეცნობით 16 წლის ასაკს მიუღწეველ, 2006 წელს დაბადებულ გოგონასთან სქესობრივი კავშირი დაამყარა“, – აცხადებენ შსს-ში.
საქმეზე გამოძიება სისხლის სამართლის კოდექსის 140-ე მუხლით მიმდინარეობს, რაც დამნაშავისათვის წინასწარი შეცნობით თექვსმეტი წლის ასაკს მიუღწევლის სხეულში სექსუალური ხასიათის შეღწევას გულისხმობს. დანაშაული 7-დან 9 წლამდე ვადით თავისუფლების აღკვეთას ითვალისწინებს.
გუშინ ცნობილი გახდა, რომ ქობულეთის მუნიციპალიტეტი სოფელ ქაქუთში სიცოცხლე თვითმკვლელობით დაასრულა 14 წლის გოგომ. ოჯახის ერთ-ერთი წევრის განცხადებით, ის რამდენიმე თვის წინ 23 წლის მამაკაცმა გააუპატიურა. გამოძიება სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს.
Loading ...