წელს უცხოეთიდან რეადმისიის ფარგლებში უნებართვოდ მცხოვრები საქართველოს 1 143 მოქალაქე დააბრუნეს – ამის შესახებ აღნიშნულია შინაგან საქმეთა სამინისტროს 2025 წლის პირველი კვარტლის მონაცემებში. აღსანიშნავია, რომ გასული წლის ანალოგიურ პერიოდში ევროკავშირიდან საქართველოს 1 051 მოქალაქე გამოაბრუნეს.
როგორც ოფიციალური მონაცემებიდან ირკვევა, წელს პირველ კვარტალში ყველაზე მეტი – 467 მოქალაქე გერმანიიდან დააბრუნეს, საფრანგეთიდან – 274; ხოლო ირლანდიიდან 137.
ათეულის დანარჩენი ქვეყნების მონაცემები ასე გამოიყურება:
- საბერძნეთი – 30
- იტალია – 25
- პოლონეთი – 14
- ავსტრია – 12
- ესპანეთი – 10
- ჰოლანდია – 6
- შვედეთი/ბელგია/ჩეხეთი – თითოეულიდან 5 მოქალაქე
რაც შეეხება 2024 წლის სრულ სტატისტიკას, შარშან რეადმისიას საქართველოს 4 171 მოქალაქე დაექვემდებარა.
შეგახსენებთ, რომ საქართველოსა და ევროკავშირს შორის „უნებართვოდ მცხოვრებ პირთა რეადმისიის შესახებ“ შეთანხმება 2011 წლის 1-ელ მარტს ამოქმედდა. შეთანხმების საფუძველზე ხდება ევროკავშირის ტერიტორიაზე არალეგალურად მცხოვრები საქართველოს მოქალაქეების საქართველოში დაბრუნება. შეთანხმება ასევე ითვალისწინებს მესამე ქვეყნების მოქალაქეთა საქართველოში დაბრუნებას შეთანხმებით დადგენილი პირობების საფუძველზე. რეადმისიასა და ტრანზიტთან დაკავშირებულ ყველა სატრანსპორტო ხარჯს, საბოლოო დანიშნულების სახელმწიფოს საზღვრამდე, მოთხოვნის წარმდგენი სახელმწიფო აანაზღაურებს.
Loading ...