ქარიშხალმა “მილტონმა”, რომელიც აშშ-ს ფლორიდის შტატის დასავლეთ სანაპიროს ხუთშაბათს ღამით დაატყდა თავს, 16 ადამიანი იმსხვერპლა. ამის შესახებ CBS-ი ფლორიდის სამართალდამცავ დეპარტამენტზე დაყრდნობით იტყობინება. მას შემდეგ რაც მაშველებმა დაიწყეს დატბორილი და დანგრეული ადგილების შესწავლა, მსხვერპლთა რიცხვი იზრდება.
მიყენებული ზარალის ოდენობის ზუსტი შეფასება ჯერ არ არსებობს, თუმცა უკვე აშკარაა, რომ ის მნიშვნელოვანი იქნება.
საცხოვრებელ შენობებს, ეკლესიებს, კერძო და საჯარო შენობებს მნიშვნელოვანი ზიანი მიადგა.
დაზიანებული ელექტროგადამცემი ხაზების გამო, ფლორიდაში დაახლოებით 3 მილიონი შენობა კვლავ ელექტროენერგიის გარეშეა დარჩენილი, ხოლო ზოგიერთი დასახლება წყლის გარეშეცაა დარჩენილი.
ადგილობრივი ხელისუფლების ინფორმაციით, მაშველებმა სტიქიის ზონაში 1000-მდე ადამიანი გადაარჩინეს. ქარიშხლის დაწყებამდე, მეტეოსამსახურის გაფრთხილების შემდეგ, პოტენციურად სახიფათო რაიონები დატოვა რამდენიმე მილიონმა ადამიანმა.
მექსიკის ყურიდან წამოსულმა შტორმმა, რომელსაც თავდაპირველად მაქსიმალური, მეხუთე კატეგორია მიანიჭეს, ფლორიდამდე ძალა მესამე კატეგორიამდე დაკარგა, 9 ოქტომბერს, სიესტა-კის რაიონში ხმელეთზე გადასვლის შემდეგ კი ჯერ მეორე, შემდეგ კი პირველ კატეგორიამდე შესუსტდა.
მიუხედავად ამისა „მილტონმა“ ფლორიდის შტატის ნაწილს მრავალმილიარდიანი ზიანი მიაყენა. არაერთ რაიონში დაწყებულია ინფრასტრუქტურის აღდგენის სამუშაოები
Loading ...
