2021 წლის 9 თვეში საქართველოში საგარეო სავაჭრო ბრუნვამ 10 მილიარდ დოლარს გადააჭარბა. აღნიშნული მაჩვენებელი წინა წლის შესაბამის პერიოდთან შედარებით 22.3%-ით მეტია. გაზრდილია იმპორტი 21.6%-ით და ექსპორტი კიდევ უფრო მეტად – 24%-ით.
უმსხვილეს საექპორტო საქონელს შორის კვლავ შედის ღვინო, რომლის გაყიდვებმაც 16.5%-ით იმატა, 28%-ით გაიზარდა მინერალური წყლების ექსპორტიც; ქართული თხილი კი საექსპორტო ათეულში მოწინავე პოზიციებს ნელ-ნელა იბრუნებს.
თხილის გადამამუშავებელთა და ექსპორტიორთა ასოციაციის აღმასრულებელი დირექტორი ლევან ქარდავა “საქმის კურსთან” ამბობს, რომ ერთი მხრივ, გაიზარდა მოსავლის მოცულობა, მეორე მხრივ კი ექსპორტის ზრდას ხელი შეუწყო იტალიიდან გაზრდილმა მოთხოვნამ.
“აგვისტოდან ანუ ახალი სეზონიდან, გაზრდილია თხილის მოცულობა 60 ათასი ტონიდან 75-80 ათას ტონამდე. მეორე მხრივ, პრობლემები იყო იტალიაში მოსავლიანობის კუთხით, რამაც ამ ქვეყნიდან მოთხოვნა გაზარდა. შედეგად საქართველოსთვის იტალია ნომერ პირველი თხილის საექსპორტო ქვეყანა გახდა, როცა აქამდე ამ პოზიციას გერმანია იკავებდა.
აღსანიშნავია, რომ 2020 წელსაც ბევრად უკეთესი რაოდენობისა და ხარისხის მოსავალი გვქონდა, ვიდრე 2019 წელს. ეს ყველაფერი განაპირობებს იმას, რომ ექსპორტი საერთო ჯამში იზრდება”, – აცხადებს ლევან ქარდავა.
კითხვაზე – შეიძლება თუ არა ითქვას, რომ აზიური ფაროსანის პრობლემა ქვეყანაში გადაიჭრა, ლევან ქარდავა პასუხობს, რომ “ფაროსანა არასად წასულა, უბრალოდ, მოსახლეობამ ამ პრობლემის მართვა ისწავლა”.
Loading ...
