დაბა ურეკში სამსართულიან სასტუმროში გაჩენილი ხანძარი ჩამქრალია, დარჩენილია ცალკეული კერები.
ცეცხლი სამსართულიანი სასტუმროს სხვენს გაუჩნდა. ხანძარი მასშტაბური იყო. როგორც შეკვეთილის სახანძრო – სამაშველო სამსახურის განყოფილების უფროსმა , ვარდენ რუსიეშვილმა გვითხრა ადგილზე მობილიზებულია ურეკის, შეკვეთილის, ოზურგეთის, ქობულეთისა და ფოთის სამაშველო ბრიგადები.
სასტუმროში მყოფი პირები მეხანძრე-მაშველებმა გამოიყვანეს. ხანძარი ამ დროისთვის ლოკალიზებულია და სალიკვიდაციო სამუშაოები მიმდინარეობს. ხანძრის შედეგად არავინ დაშავებულა.
საგანგებო სიტუაციების მართვის სამსახური ურეკში, ერთ-ერთ სასტუმროში გაჩენილ ხანძართან დაკავშირებით, განცხადებას ავრცელებს. ცეცხლი ამჟამად ლიკვიდირებულია.
შინაგან საქმეთა სამინისტროს საზოგადოებრივი უსაფრთხოების მართვის ცენტრ “112”-ში შემოვიდა ინფორმაცია, რომ დაბა ურეკში თაყაიშვილის ქუჩაზე მდებარე ერთ-ერთი სასტუმროს მეოთხე სართულზე შეინიშნებოდა ძლიერი დაკვამლიანება და ღია ცეცხლი.
შეტყობინებაზე რეაგირება უმოკლეს დროში მოახდინა საგანგებო სიტუაციების მართვის სამსახურმა. ადგილზე დროულად გამოცხადდნენ სახანძრო-სამაშველო ძალების დეპარტამენტის თანამშრომლები და დაიწყეს ხანძრის ქრობის აქტიური სამუშაოები.
არსებობდა ცეცხლის დიდ ფართობზე გავრცელების საფრთხე, თუმცა მეხანძრე-მაშველების ოპერატიული რეაგირების შედეგად მოხერხდა ხანძრის დროული ლოკალიზება და შემდგომში სრული ლიკვიდირება. ამ დროისთვის მიმდინარეობს ცალკეული მხრჩოლავი კერების წერტილოვანი დამუშავება.
Loading ...