უკრაინის რადამ ქვეყნის ახალი პრემიერი დაამტკიცა

უკრაინის რადამ იულია სვირიდენკო პრემიერ-მინისტრად დაამტკიცა. გადაწყვეტილება დღევანდელ სხდომაზე 262 ხმით მიიღეს.

პრემიერად დანიშვნამდე სვირიდენკო ვიცე-პრემიერ და ეკონომიკური განვითარების მინისტრი იყო. როგორც Politico წერს, ის ერთ-ერთი მთავარი ფიგურა იყო აშშ-უკრაინას შორის მინერალებზე გარიგების პროცესში, რომლითაც აშშ აკონტროლებს უკრაინის მინერალების რესურსების დიდ ნაწილს. მან ამ თანამდებობაზე დენის შმიგალი ჩაანაცვლა, რომელიც პოსტს 2020 წლიდან იკავებდა. გამოცემის ცნობითვე, სვირიდენკო ვოლოდიმირ ზელენსკის ლოიალისტად მიიჩნევა, ის ასევე უკრაინის პრეზიდენტის ოფისის ხელმძღვანელის ანდრეი ერმაკის ნდობით აღჭურვილი პირია.

უკრაინის უკვე ახალი პრემიერი მთავარ ამოცანებად ეკონომიკის გაძლიერებას, მოსახლეობის დახმარების პროგრამების გაფართოებასა და იარაღის წარმოების ზრდას ასახელებს.

სვირიდენკო 1985 წელს, ჩერნიჰივის ოლქში დაიბადა და სკოლის დამთავრების შემდეგ სწავლა კიევის ვაჭრობისა და ეკონომიკის ეროვნულ უნივერსიტეტში გააგრძელა. ეკონომისტად მუშაობის 10 წლის თავზე, 2018 წელს სვირიდენკო საჯარო პოლიტიკაში ჩაერთო და მალე ჩერნიჰივის გუბერნატორად დაინიშნა. მომდევნო წლებში სამთავრობო კაბინეტსაც შეუერთდა და მოგვიანებით, პრეზიდენტის ადმინისტრაციაში წამყვან თანამდებობაზეც დაინიშნა.