„ქართული ოცნების“ მთავრობის გადაწყვეტილებით, უკრაინის მოქალაქეებს საქართველოში უვიზოდ ყოფნა სამი წლის ნაცვლად, მხოლოდ ერთი წლით შეეძლებათ. გადაწყვეტილებას საქართველოს მთავრობის სახელით ირაკლი კობახიძე აწერს ხელს.
რუსეთის მიერ უკრაინის ტერიტორიაზე ომის დაწყების დროს, უკრაინელებს საქართველოში უვიზოდ ყოფნა ერთი წლის ვადით შეეძლოთ. ომის დაწყებიდან ერთი წლისთავზე, 2023 წლის 24 თებერვალს, მთავრობამ მათ ქვეყანაში ყოფნის ვადა ორ წლამდე გაუხანგრძლივა, 2024 წლის 23 აპრილიდან კი ეს ვადა სამ წლამდე გაიზარდა.
ახალ დადგენილებაში, რომელიც 2025 წლის 2 აპრილით არის დათარიღებული, უკრაინელების საქართველოში ყოფნის წესები კვლავ ომამდე არსებულ მოცემულობას უბრუნდება.
ამავე დოკუმენტში აღნიშნულია, რომ გამონაკლისი დაწესდება 2025 წლის 24 თებერვლამდე საქართველოში შემოსულ უკრაინელებზე:
„უკრაინის იმ მოქალაქეებს, რომლებიც 2025 წლის 24 თებერვლამდე შემოვიდნენ და იმყოფებოდნენ საქართველოში, ყოფნის უფლება გაუგრძელდეთ 2026 წლის 24 თებერვლამდე“.
2022 წლის თებერვალში რუსეთის მიერ უკრაინის წინააღმდეგ დაწყებული სრულმასშტაბიანი ომი უკვე მეოთხე წელია მიმდინარეობს. ომს ემსხვერპლა ათასობით ადამიანი, მათ შორის ბავშვები. ასობით ათასი ადამიანი ლტოლვილად იქცა, მათგან მხოლოდ მცირე ნაწილი ჩამოვიდა საქართველოში.
Loading ...