უკრაინა ირანში მომხდარი ავიაკატასტროფის გამჭვირვალედ გამოძიებას მოითხოვს

უკრაინის მთავრობა მოითხოვს, რომ ირანში სამგზავრო „ბოინგის“ კატასტროფის მიზეზთა გამოძიება მაქსიმალურად გამჭვირვალე იყოს.

უკრაინის პრემიერ-მინისტრ ოლექსი ჰონჩარუკის განცხადებით, გამოძიებაში უნდა ჩაერთოს ყველა საერთაშორისო ორგანიზაცია, რომელსაც პროცესის მიმართ ნდობის უზრუნველყოფა შეუძლია.

პრემიერ-მინისტრის ინფორმაციით, უკრაინა ირანში გაგზავნის ჯგუფს, რომლის შემადგენლობაში იქნებიან საავიაციო ინციდენტების გამოძიების ბიუროს, სახელმწიფო საავიაციო სამსახურისა და ავიაკომპანია „უკრაინის საერთაშორისო ავიახაზების“ წარმომადგენლები.

ირანში უკრაინული ავიაკომპანიის კატასტროფის გამო პრეზიდენტმა ვოლოდიმირ ზელენსკიმ გენერალურ პროკურატურას სისხლის სამართლის საქმის აღძვრა და სპეციალური საგამოძიებო კომისიის შექმნა დაავალა. მისი განცხადებით, გამოძიებული უნდა იყოს ყველა შესაძლო ვერსია.

„უკრაინის საერთაშორისო ავიახაზების“ თვითმფრინავი „ბოინგ 737″ დღეს, 8 იანვარს ჩამოვარდა თეირანის აეროპორტის მახლობლად.

თვითმფრინავში, რომელიც თეირანი-კიევის რეისს ასრულებდა 167 მგზავრი და ეკიპაჟის 9 წევრი იმყოფებოდა. ყველა მათგანი დაიღუპა. მათ შორის იყვნენ უკრაინის, ირანის, ავღანეთის, კანადის, დიდი ბრიტანეთის, გერმანიისა და შვედეთის მოქალაქეები.

ირანული მხარის ვერსიით, კატასტროფა ძრავში გაჩენილმა ხანძარმა გამოიწვია. „უკრაინის საერთაშორისო ავიახაზები“ აცხადებს, რომ თვითმფრინავი სრულ წესრიგში იყო. ირანის საინფორმაციო საშუალებების ცნობით, „ბოინგის“ ორივე შავი ყუთი ნაპოვნია.

უკრაინის სამგზავრო თვითმფრინავის ჩამოვარდნამდე რამდენიმე საათით ადრე, აშშ-ის სამოქალაქო ავიაციის ფედერალურმა სააგენტომ ამერიკულ ავიაკომპანიებს აუკრძალა ფრენა ერაყის, ირანის და სპარსეთისა და ომანის ყურეთა საჰაერო სივრცეში.

ფედერალურმა სააგენტომ გადაწყვეტილება მას შემდეგ მიიღო, რაც 8 იანვარს, ირანმა სარაკეტო იერიშები განახორციელა ერაყის ბაზებზე მყოფი ამერიკელი სამხედროების წინააღმდეგ.

ირანსა და აშშ-ს შორის ურთიერთობა უკიდურესად დაიძაბა მას შემდეგ, რაც 3 იანვარს, პრეზიდენტ ტრამპის ბრძანებით, ერაყის დედაქალაქ ბაღდადის აეროპორტთან განხორციელებული საჰაერო იერიშის შედეგად მოკლეს “ირანის ისლამური რევოლუციის გუშაგთა კორპუსის“ სპეცდანიშნულების ძალების, „ყუდსის“ სარდალი, გენერალი ყასემ სოლეიმანი.

ამ სამხედრო სამხედრო ოპერაციის შემდეგ დონალდ ტრამპმა განაცხადა, რომ მოკლულია მსოფლიოში „ნომერ პირველი ტერორისტი“, რომელიც ბოლო 20 წლის განმავლობაში ახლო აღმოსავლეთში დესტაბილიზაციას უწყობდა ხელს და ამერიკელ დიპლომატებსა და სამხედროებზე თავდასხმებს გეგმავდა.

8 იანვარს ირანის ხელისუფლებამ გამოაცხადა, რომ ერაყში ამერიკელი სამხედროების წინააღმდეგ განხორციელებული სარაკეტო იერიში იყო შურისძიება გენერალ სოლეიმანის მკვლელობის გამო.

www.radiotavisupleba.ge