უკრაინის პრეზიდენტმა ვოლოდიმირ ზელენსკიმ ხელმოწერით დაადასტურა ეროვნული უშიშროების საბჭოს გადაწყვეტილება, პარლამენტის დეპუტატ ტარას კოზაკის და მის მფლობელობაში არსებული ტელეკომპანიების, „112 უკრაინა“, NewsOne და ZIK-ის წინააღმდეგ 5-წლიანი სანქციების ამოქმედების შესახებ.
ტარას კოზაკი პრორუსული ორიენტაციის საპარლამენტო ფრაქციის „ოპოზიციური პლატფორმა – სიცოცხლისთვის“ წევრია.
უკრაინის პრეზიდენტის ადმინისტრაციაში განაცხადეს, რომ გადაწყვეტილება მიღებულია ეროვნული უსაფრთხოების დასაცავად, რადგან ეს 3 ტელეარხი უცხო ქვეყნის დეზინფორმაციული აქტივობის და პროპაგანდის ნაწილია.
ეთერიდან გათიშული სამი ტელეკომპანიის მფლობელმა მედიაჰოლდინგმა უკრაინის ხელისუფლება დაადანაშაულა მისთვის მიუღებელ მედიასაშუალებებზე პოლიტიკურ ანგარიშსწორებაში და განაცხადა, რომ ეთერში ტოვებენ მხოლოდ იმ არხებს, რომლებიც უკრაინელ ხალხს უყვებიან რეალურად არარსებულ წარმატებებზე.
უკრაინული მედიასაშუალებების ინფორმაციით, ეთერიდან გათიშული სამი ტელეკომპანია რეალურად ეკუთვნის პარლამენტის დეპუტატს, პარტია „ოპოზიციური პლატფორმა – სიცოცხლისთვის“ ერთ-ერთ ლიდერს და უკრაინაში ერთ-ერთ ყველაზე მდიდარ და გავლენიან ადამიანს, ვიქტორ მედვედჩუკს. ის უარყოფს, რომ ტელერხების მფლობელია.
მედვედჩუკს, რომლის ქალიშვილის ნათლია რუსეთის პრეზიდენტი პუტინია, 2014 წელს აშშ-მა პერსონალური სანქციები დაუწესა უკრაინაში დემოკრატიის ხელყოფისთვის.
www.radiotavisupleba.ge
Loading ...
