უბედური შემთხვევის შედეგად “მანგოს” მაღაზიათა ქსელის დამფუძნებელი დაიღუპა

ესპანური მაღაზიათა ქსელის Mango-ს 71 წლის დამფუძნებელი, ისაკ ანდიკი, კატალონიის მონსერატის მონასტრისკენ მიმავალ გზაზე, მთაში სიმაღლიდან ჩამოვარდნის შედეგად გარდაიცვალა, იუწყება El Pais წყაროებზე დაყრდნობით.

ცნობა ანდიკის გარდაცვალების შესახებ თავად კომპანიამ გაავრცელა, თუმცა არ დაუკონკრეტებია რა ვითარებაში მოხდა უბედური შემთხვევა.

„ისაკი მაგალითი იყო ყველა ჩვენგანისთვის. მან თავისი ცხოვრება მიუძღვნა “მანგოს”, დატოვა წარუშლელი კვალი მისი სტრატეგიული ხედვით, შთამაგონებელი ლიდერობით და ურყევი ერთგულებით იმ ღირებულებების მიმართ, რაც მან თავად დანერგა ჩვენს კომპანიაში. <…> მისი გარდაცვალება ტოვებს უზარმაზარ სიცარიელეს, მაგრამ ჩვენ ყველანი ვართ, გარკვეულწილად, მისი მემკვიდრეობა და მისი მიღწევების აღთქმა“, – ნათქვამია კომპანიის განცხადებაში.

El Pais-ის ცნობით, ანდიკი მთებითა და ლაშქრობით იყო დაინტერესებული და დღე ოჯახთან ერთად გაატარა. ის 100 მეტრზე მეტი სიმაღლიდან გადმოვარდა და მისი გადარჩენა ვერ მოხერხდა.

ისაკ ანდიკმა დააარსა Punto Fa, S.L თავის ძმასთან ნაჩმანთან ერთად 1984 წელს, როდესაც მათ გახსნეს პირველი Mango ქალთა ტანსაცმლის მაღაზია ბარსელონაში. ბრენდი ახლა წარმოდგენილია 110-ზე მეტ ქვეყანაში და აქვს დაახლოებით 2700 მაღაზია მთელს მსოფლიოში. წელს ჟურნალმა Forbes-მა კატალონიის უმდიდრეს ადამიანად ისაკ ანდიკი აღიარა და ის ესპანეთის უმდიდრეს ადამიანთა სიაშიც მოხვდა. ანდიკისა და მისი ოჯახის ქონება 4,5 მილიარდ ევროდ არის შეფასებული.

www.meduza.io