ტრანსპორტი, პასპორტის აღება – სახელმწიფო სერვისები, რომლებიც წელს გაძვირდა

2023 წლის 1-ელი იანვრიდან ავტომანქანის რეგისტრაციის საფასური 65 ლარით, ხოლო ნომრის აღება 45 ლარით ძვირდება.

შსს-ს მომსახურების სააგენტოს ცალკეული მომსახურების საფასურების გაძვირებამდე, მიმდინარე წელს საქართველოს მოქალაქეებს უკვე არაერთი სახელმწიფო სერვისი გაუძვირდათ.

„ბიზნეს ფორმულა“ გთავაზობთ, გაძვირებული სერვისების ჩამონათვალს:

საზოგადოებრივი ტრანსპორტით მგზავრობა

2022 წლის 1-ელი თებერვლიდან დედაქალაქში საზოგადოებრივი ტრანსპორტით მგზავრობა 1 ლარამდე გაძვირდა.

შედეგად, საზოგადოებრივ ტრანსპორტში (მეტრო, ავტობუსი, მიკროავტობუსი, საბაგირო) ერთჯერადად გადახდის შემთხვევაში, მოქალაქეები 50 თეთრის ნაცვლად 1 ლარს იხდიან. ამასთან, ამოქმედდა სააბონენტო ბარათები,

სატრანსპორტო საშუალებების საჯარიმო სადგომზე გადაყვანა

31 მარტიდან თბილისის პარკინგის სპეციალურ საჯარიმო სადგომზე სატრანსპორტო საშუალებების გადაყვანისა და 24 საათის განმავლობაში შენახვის საფასური გაიზარდა.

კერძოდ, სატრანსპორტო საშუალებების ევაკუაციის საფასურად განისაზღვრა 150 ლარით, რაც მანამდე მოქმედ საფასურზე 90 ლარით მეტია. ხოლო აღნიშნულ სადგომზე ავტომობილის დამატებით დგომის ახალი ფასი შეადგენს 20 ლარს, 10 ლარის ნაცვლად.

პირადობის დამადასტურებელი მოწმობისა და ბიომეტრიული პასპორტის აღება

1-ლი მაისიდან პირადობის დამადასტურებელი მოწმობისა და ბიომეტრიული პასპორტის აღების საფასური გაიზარდა.

შედეგად, საქართველოს მოქალაქის ბიომეტრიული პასპორტის აღება 100 ლარის ნაცვლად 150 ლარი ღირს, ხოლო 30 ლარის ნაცვლად 60 ლარია პირადობის მოწმობის აღების საფასური.

საფოსტო გზავნილით შემოტანილი საქონლის გაფორმების ახალი საფასური

14 მაისიდან, საფოსტო გზავნილით 300 ლარზე მეტი ღირებულების ამანათის მისაღებად მოქალაქეებს დამატებითი თანხის გადახდა უწევთ.

კერძოდ, მთავრობის დადგენილებით, საფოსტო გზავნილით შემოტანილი საქონლის გაფორმებაზე საფასური განისაზღვრება შემდეგნაირად:

• 300-დან 3 000 ლარამდე ღირებულების საქონელზე – 20 ლარი;
• 3 000-დან 10 000 ლარამდე ღირებულების საქონელზე – 100 ლარი;
• 10 000 ლარზე მეტი ღირებულების საქონელზე – 300 ლარი.

ქორწინების სარიტუალო მომსახურება

1-ელი აგვისტოდან საქართველოში ქორწინების სარიტუალო მომსახურების საფასური გაიზარდა.

ქორწინების რიტუალის საზეიმო ვითარებაში ჩატარების ღირებულება, იუსტიციის სახლის ფილიალში ან საზოგადოებრივ ცენტრში, 25 ლარით 75 ლარამდე გაძვირდა.

სამედიცინო და ფარმაცევტული საქმიანობის რეგულირების სააგენტოს მომსახურება

5 აგვისტოდან სამედიცინო და ფარმაცევტული საქმიანობის რეგულირების სააგენტოს სხვადასხვა მომსახურების საფასური გაიზარდა.

შედეგად, უცხოეთიდან მოწვეული სპეციალისტისთვის საქართველოში დროებითი საექიმო საქმიანობის უფლების მინიჭების მიზნით მომსახურების ახალი ფასი 700 ლარია, 350 ლარის ნაცვლად. უწყვეტი სამედიცინო განათლების პროგრამების სააკრედიტაციო მომსახურების საფასური უსგ პროგრამის აკრედიტაციისთვის 1000 ლარამდე გაიზარდა, მაშინ როდესაც ძველი ფასი 350 ლარი იყო.