ტრამპისა და ზელენსკის შეხვედრა დასრულდა – რა არის ცნობილი ამ დროისთვის

აშშ-ის პრეზიდენტ დონალდ ტრამპსა და უკრაინის ლიდერ ვოლოდიმირ ზელენსკის შორის მოლაპარაკებები ფლორიდაში კვირას, 28 დეკემბერს, კიევის დროით 20:30 საათზე დაიწყო. 2,5 საათის შემდეგ შეხვედრა დასრულდა და ამჟამად მიმდინარეობს ორი პრეზიდენტის ვიდეოკონფერენცია ევროპელ ლიდერებთან, ამის შესახებ იტალიის საგარეო საქმეთა მინისტრმა ანტონიო ტაიანიმ განაცხადა. ინფორმაციას Corriere Della Sera ავრცელებს.

გამოცემის ცნობით, ვიდეოშეხვედრაში ასევე მონაწილეობს იტალიის მინისტრთა საბჭოს თავმჯდომარე ჯორჯია მელონი.

„ჩვენ სრულად ვუჭერთ მხარს აშშ-ის ინიციატივას. ახლა ვნახოთ, როგორ განვითარდება მოვლენები, ყველაფერი პროცესშია. დავაკვირდებით, მიიღებს თუ არა პუტინი ამ წინადადებებს. უსაფრთხოების საკითხი გადამწყვეტია ჩვენთვისაც, ევროპელებისთვის. ევროპამ მნიშვნელოვანი როლი უნდა შეასრულოს: ჩვენ ერთიან ფრონტად უნდა ვიმოქმედოთ შეერთებულ შტატებთან ერთად, რადგან შეგვიძლია ვიყოთ ძლიერი პარტნიორი ომის ეპოქის დასრულებაში“, — განაცხადა ტაიანიმ ტელეკომპანია Rete4-ის გადაცემაში Zona Bianca.

აშშ-ის პრეზიდენტმა დონალდ ტრამპმა ზელენსკისთან შეხვედრამდე განაცხადა, რომ მოლაპარაკებები დასკვნით ეტაპს უახლოვდება. მისი თქმით, როგორც კიევს, ისე მოსკოვს სურთ უკრაინაში ომის შეწყვეტის შესახებ შეთანხმების მიღწევა.

უკრაინული დელეგაციის შემადგენლობაში არიან: უკრაინის ელჩი აშშ-ში ოლგა სტეფანიშინა, საგარეო საქმეთა მინისტრის პირველი მოადგილე სერგეი კისლიცა, ეროვნული უსაფრთხოებისა და თავდაცვის საბჭოს მდივანი რუსტემ უმეროვი, უკრაინის შეიარაღებული ძალების გენშტაბის უფროსი ანდრეი გნატოვი, პრეზიდენტის ადმინისტრაციის მრჩეველი ალექსანდრ ბევზი და ეკონომიკის მინისტრი ალექსეი სობოლევი.

ამერიკული მხრიდან მოლაპარაკებებში მონაწილეობენ: სახელმწიფო მდივანი მარკო რუბიო, სპეციალური წარმომადგენელი სტივ უიტკოფი, გენერალი დენ კეინი, ტრამპის მრჩეველი შიდა უსაფრთხოების საკითხებში, თეთრი სახლის ადმინისტრაციის ხელმძღვანელი სიუზი უაილსი, ტრამპის სიძე ჯარედ კუშნერი და ფედერალური სამსახურის კომისარი ჯოშ გრიუნბაუმი.