სოფელ ძიმითში ხელმოწერების შეგროვებას იწყებენ

ოზურგეთის მუნიციპალიტეტის სოფელ ძიმითში, მდინარე სუფსაზე კარიერული წარმოების გასაპროტესტებლად მოსახლეობა კვლავ შეიკრიბა. თუმცა შეხვედრაზე არ მოვიდნენ კომპანია “სამი ძმის” წარმომადგენლები. ადგილობრივები ამბობენ, რომ მდინარეზე კომპანიის მიერ ინერტული მასალების მოპოვების სამუშაოები მოსახლეობის კუთვნილ ნაკვეთებზე მიმდინარეობს. ამასთანავე ზიანდება მდინარე და ეკოსისტემა. ადგილობრივები სუფსაზე კარიერული წარმოების შეჩერებას ითხოვენ. შეხვედრას ესწრებოდა გარემოსდაცვითი ორგანიზაცია “ეკოც”. როგორც მისი თავმჯდომარე ირმა გორდელაძე ამბობს, კომპანია “სამ ძმას” დოკუმენტაცია წესრიგში არა აქვს. შეხვედრის შედეგად გადაწყდა, რომ მოსახლეობაში ხელმოწერები შეგროვდება და სოფელი ძიმითი საკუთარი ინტერესების დაცვას სასამართლოში გააგრძელებს. ამჟამად მოსახლეობის პროტესტის შედეგად კომპანიის “სამი ძმა” მიერ მდინარეზე ინერტული მასალების მოპოვების სამუშაოები დროებით შეჩერებულია.