ოზურგეთის მუნიციპალიტეტის სოფელ შრომაში, ისევე როგორც მთელ ქვეყანაში, ბოლო პერიოდში ეპიდემიოლოგიური სიტუაცია შესამჩნევლად გაუარესდა. როგორც სპეციალისტები ამბობენ, ინფიცირებულთა ზრდა დელტა შტამის გავრცელებას უკავშირდება, რომელიც უფრო ადვილად ვრცელდება ვიდრე ვირუსის წინა შტამები. ამ დროის მონაცემებით, სოფელში კორონავირუსით დაახლოებით 40-მდე ადამიანი არის ინფიცირებული.
„სოფელ შრომაში სიტუაცია არადამაკმაყოფილებელია“ – ამბობს ჩვენთან საუბრისას სოფლის ამბულატორიის ექიმი, ირმა რობაქიძე. იგი აღნიშნავს, რომ მოსახლეობის ნაწილში ვაქცინაციის მიმართ განწყობა სამწუხაროდ არაგონივრულია.
„ჩემი პირადი პრაქტიკიდან შემიძლია გითხრათ, რომ ვაქცინირებულ პირებში დაავადება მიმდინარეობს მსუბუქად, ხშირად უსიმპტომოდ. ჯანმრთელ საზოგადოებას ყოველთვის მოვუწოდებ ვაქცინაციისკენ. ავიცრათ ერთმანეთისთვის, აცრა არის ერთადერთი გამოსავალი ამ რთული მდგომარეობიდან, ვატაროთ პირბადე, დავიცვათ სოციალური დისტანცია, მოვერიდოთ შეკრებებს და ხშირად დავიბანოთ ხელები“ – ამბობს ექიმი.
რთული სიტუაციის შედეგად, სოფელ შრომის საჯარო სკოლა 12 დღით მთლიანად დისტანციურ სწავლებაზე გადავიდა. გადაწყვეტილების მიღების მიზეზი კი სკოლის 7 მასწავლებლის და 4 მოსწავლის COVID19-ით ინფიცირება გახდა.
„სკოლაში ყოველთვის მკაცრად ვიცავდით რეგულაციებს, მაგრამ, როგორც ჩანს, უჩინარი მტერი მაინც ახერხებს თუნდაც ფრთხილი ადამიანების დაინფიცირებას. დღევანდელი მონაცემებით 7 მასწავლებელი და 4 მოსწავლე არის ინფიცირებული, მაგრამ გვყავს კიდევ 3-4 სიმპტომიანი მასწავლებელი, რომლებსაც ჯერ ლაბორატოლიურად ინფექცია არ აქვთ დადასტურებული. აღნიშნულიდან გამომდინარე, ჯანდაცვასთან ერთად მივიღეთ გადაწყვეტილება, 12 დღის განმავლობაში გადავსულიყავით სწავლების დისტანციურ რეჟიმზე, რათა თავიდან ავიცილოთ ვირუსის კიდევ უფრო გავრცელება. ახლა ვდგავართ ფაქტის წინაშე, კვლავ და კვლავ გავატაროთ პრევენციული ქმედებები“ – გვეუბნება სკოლის დირექტორი.
ოზურგეთის საზოგადოებრივ ჯანდაცვაში ამბობენ, რომ ეპიდ.სიტუაცია მთელი მუნიციპალიტეტის მასშტაბით შემაშფოთებელია, მათ შორის სოფელ შრომაშიც. ჯანდაცვის ცენტრის ეპიდემიოლოგის ელზა სიმონიშვილის თქმით, კონკრეტულად სოფელ შრომაში დღეს COVID 19-ით ინფიცირების 3 ახალი შემთხვევა გამოვლინდა. ეპიდემიოლოგი მოსახლეობას ვაქცინაციის ჩატარებისა და რეგულაციების დაცვისკენ მოუწოდებს.
მასალა პროექტის “ჩვენ ვირჩევთ, ჩვენ ვაკონტროლებთ” ფარგლებში, ავთო ხომერიკმა მოამზადა. Funded through the Alumni Grants Program, U.S. Embassy in Georgia/დაფინანსებულია საქართველოში აშშ-ის საელჩოს ალუმნი საგრანტო პროგრამის ფარგლებში.
Loading ...
