ოზურგეთის მუნიციპალიტეტის სოფელ მერიაში, ყოფილი სამხედრო აეროდრომის ტერიტორიაზე, მრავალბინიან კორპუსში, სადაც 70 სოციალურად დაუცველი ოჯახი ცხოვრობს, საყოფაცხოვრებო პირობები ძალიან მძიმეა. მობინადრენი, უკვე წლებია, ითხოვენ მის გაუმჯობესებას, მაგრამ ამაოდ. მოსახლეობა კანალიზაციის სისტემის მოუწესრიგებლობასა და საბავშვო, გასართობი სივრცის არარსებობაზე საუბრობს. კორპუსის ერთ – ერთი მობინადრე, ”გურიაTV”-თან საუბარში აღნიშნავს:
„საცხოვრებელი კორპუსის სარდაფში დგას წყალი, არის საშინელი ანტისანიტარია და კანალიზაციის გაუსაძლისი სუნი. ზაფხულში კი, ამ ყველაფერს ქვეწარმავლებისა და მღრღნელების პრობლემაც ერთვის, რომელიც სასიცოცხლო საფრთხეს უქმნის მოსახლეობას“.
მრავალბინიან საცხოვრებელს, ასევე, არ გააჩნია სკვერი, სადაც ბავშვები უსაფრთხოდ შეძლებენ თამაშსა და გართობას.
“საბურავებზე,ხრეშზე და ტალახში თამაშობენ ბავშვები. დიდი ტერიტორია გვაქვს და ხომ შეუძლიათ ელემენტარულად სკვერი მაინც გაგვიკეთონ. ყურადღებას არ გვაქცევენ, მხოლოდ მაშინ ვახსენდებით,როცა არჩევნებია”.
მოსახლეობამ ადგილობრივ მუნიციპალიტეტს, დახმარების მიზნით, მრავალჯერ მიმართა, თუმცა ქმედითი ღონისძიებები, მათი მხრიდან, ჯერჯერობით, ისევ არ გადადგმულა.
რა გეგმები აქვს ადგილობრივ ხელისუფლებას აღნიშნულ კორპუსთან დაკავშირებით, ამის გარკვევას ”გურიაTV” ოზურგეთის მუნიციპალიტეტის მერიაში შეეცდება.
ავტორები: ანი დოლიძე, ლიკა თურქაძე
მასალა მომზადებულია პროექტის “განათლებული, პროფესიონალი კადრები რეგიონული მედიის გაძლიერებისთვის” ფარგლებში.
Loading ...