სინგაპურის მთავრობა მოქალაქეებს, პანდემიის პერიოდში ბავშვის გაჩენის შემთხვევაში, ერთჯერად ფულად დახმარებას გაუწევს. ამის შესახებ ინფორმაციას CNN ავრცელებს.
როგორც გამოცემა წერს, ამ ინიციატივით ქვეყნის მთავრობა ცდილობს წაახალისოს მოქალაქეები, რომლებიც ფინანსური წნეხის საფრთხის ქვეშ დგანან ან სამსახურების დაკარგვის ეშინიათ.
„კვლევებმა გვიჩვენა, რომ წყვილების ნაწილმა ბავშვის ყოლა გადაიფიქრა პანდემიის გამო, რაც სრულიად გასაგებია, განსაკუთრებით იმ კუთხით, რომ ისინი გაურკვევლობაში არიან საკუთარ შემოსავლებთან დაკავშირებით“, – განაცხადა პრემიერ მინისტრის მოადგილემ ჰენგ სვი კიტმა.
თუმცა პრემიერ-მინისტრის მოადგილეს არ დაუკონკრეტებია, რა ოდენობოს ფინანსური დახმარების გაწევას გეგმავს ქვეყანა.
„როგორც ბევრი განვითარებული ქვეყნის პრობლემა, სინგაპურის გამოწვევაც დაბალი ნაყოფიერება და ხნიერი მოსახლეობაა. ჩვენი მიზანია მივაღწიოთ მდგრად მოსახლეობას, რომელიც ხელს უწყობს როგორც ეკონომიკურ ზრდას, ასევე სოციალურ ერთობას“, – აღნიშნულია მთავრობის განცხადებაში.
როგორც გამოცემა წერს, მიუხედავად იმისა რომ ქვეყნის ჯანდაცვა წარმატებით უმკლავდება პანდემიას, სინგაპურის ეკონომიკა რეცესიაშია. აღსანიშნავია, რომ მშპ-ი 12.6%-ით შემცირდა მეორე კვარტალში გასული წლის ანალოგიურ პერიოდთან შედარებით.
Loading ...
