სახლებს ნაპრალები გაუჩნდა, ბავშვები ქუჩაში ვეღარ გადიან – რას აპროტესტებენ სოფელ მელექედურში

სოფელი მელექედური ოზურგეთის ერთ-ერთი პატარა დასახლებაა. თუმცა ტერიტორიისა და მოსახლეობის სიმცირის მიუხედავად, უამრავი პრობლემა იყრის ერთად თავს. რამდენიმე წლის წინ სოფელში მდინარე ნატანებზე კარიერული წარმოება დაიწყო. თავდაპირველად, ამ სიახლეს ყველა კარგად შეხვდა, მაგრამ წლების შემდეგ სხვადასხვა პრობლემამ იჩინა თავი. კარიერის მიმდებარედ მცხოვრებ მოსახლეობას ზაფხულში წყლის პრობლემა შეექმნა. მდინარის კალაპოტის შეცვლამ ნიადაგის გამოშრობა და უწყლობა გამოიწვია, ზოგ ადგილას პრობლემა იმდენად მწვავე იყო, რომ სასმელად ვარგისი წყლის ყიდვის აუცილებლობა შეიქმნა.

სოფელ მელექედურის ერთ-ერთი მაცხოვრებელი თინა ფარახელაშვილი თემასთან დაკავშირებით თავის მოსაზრებას გვიზიარებს:

სანამ კარიერი გაიხსნებოდა, არასოდეს გვქონია წყლის პრობლემა, გვალვაშიც კი საკმარისზე მეტი წყალი იყო ჭაში, ახლა კი სასმელ წყალს ვყიდულობთ, სხვა საჭიროებებისთვის კი წვიმის მოლოდინში ვართ. გაუსაძლისია ზაფხულში ასეთ პირობებში ცხოვრება. ამას არა მარტო ჩვენი ოჯახი, არამედ მთელი სოფლის მოსახლეობა ამბობს.

კარიერის აშენებამ დასახლებაში გარდა უწყლობისა, გზის პრობლემაც შექმნა. ტრაილერები, სატვირთოები და სხვადასხვა ტიპის გადამზიდი მანქანა  სოფელში ხმაურს იწვევს, გზას აფუჭებს და მცირეწლოვანებისთვის საფრთხეს წარმოადგენს.

მზია სამსონია, ადგილობრივი:

მთელი დღე-ღამის განმავლობაში დიდი მანქანების მიმოსვლა არ წყდება. ეს ყველაფერი იმდენად დიდ ხმაურს იწვევს, ღამით დაძინებაც რთულია. გარდა ამისა, სახლებს რყევისგან ნაპრალები გაუჩნდა. ყველაფერს რომ თავი დავანებოთ, ბავშვები ქუჩაში ვეღარ გადიან, გზაზე ინტენსიურად მოძრავი სატვირთო ავტომობილები დიდ საფრთხეს წარმოადგენს მათთვის. როგორც ვიცით, მსგავსი ტიპის მანქანები სხვა შემოვლითი გზით უნდა სარგებლობდნენ, სადაც დასახლებული პუნქტები არ არის, თუმცა შემოვლით გზებზე მიმოსვლისთვის ცუდი პირობებია და ამიტომ ამ გზა ამჯობინებენ. სამეზობლომ არაერთხელ გამოვთქვით პროტესტი ამ ყველაფრის წინააღმდეგ, თუმცა ყოველ ჯერზე უშედეგოდ.

წლების წინ აშენებულმა კარიერმა სოფელში თანდათანობით სხვადასხვა საფრთხე და პრობლემა წარმოშვა. მოსახლეობა დახმარების მოლოდინშია, რადგან რთული და გაუსაძლისია ზაფხულში წყლის გარეშე, ხოლო წელიწადის ყველა სეზონზე ხმაურსა  და საფრთხეში ცხოვრება.

მასალა პროექტის “ჩვენ ვირჩევთ, ჩვენ ვაკონტროლებთ” ფარგლებში, ანანო ჩაგუნავამ მოამზადა.

Funded through the Alumni Grants Program, U.S. Embassy in Georgia/დაფინანსებულია საქართველოში აშშ-ის საელჩოს ალუმნი საგრანტო პროგრამის ფარგლებში