შინაგან საქმეთა სამინისტროს გენერალურმა ინსპექციამ რვა ადამიანი დააკავა საწვავის მოპარვის ბრალდებით. დაკავებულებს შორის ორი ამავე უწყების დაცვის პოლიციის დეპარტამენტის თანამშრომელია.
დაკავებულებს ოთხიდან შვიდ წლამდე პატიმრობა ემუქრებათ.
“გამოძიებით დადგინდა, რომ ბრალდებულები, სპეციალურად დამონტაჟებული სატუმბის – ე.წ. პომპის მეშვეობით, თბილისში, რკინიგზის მახარისხებელ სავაგონო პარკში არსებული, ერთ-ერთი კომპანიის კუთვნილი ვაგონ-ცისტერნიდან დიდი ოდენობით საწვავს იპარავდნენ”, – წერია უწყების პრესსამსახურის გავრცელებულ განცხადებაში.
აქვე აღნიშნულია, რომ ნივთმტკიცებად ამოღებულია ტონა-ნახევარი საწვავი, რომელიც მოთავსებული იყო 87 ცალ 20-ლიტრიან ბიდონში. ასევე ამოღებულია 127 ცარიელი 20-ლიტრიანი ბიდონი.
საქმეზე გამოძიება საქართველოს სისხლის სამართლის კოდექსის 177-ე მუხლის მე-3 ნაწილის “ა” ქვეპუნქტით მიმდინარეობს. ამ მუხლით სისხლისსამართლებრივი პასუხისმგებლობა დგება წინასწარი შეთანხმებით ჯგუფის მიერ ქურდობის შემთხვევაში.
Loading ...
