დიდ ბრიტანეთში მიმდინარე საერთაშორისო ტურისტულ გამოფენაზე WTM London-2019 საქართველო ევროპის საუკეთესო ახალ, მიმზიდველ ტურისტულ მიმართულებებს შორის პირველ ადგილზე გავიდა.
30 ქვეყნისგან შემდგარი რეიტინგი მოგზაური ბლოგერებისგან დაკომპლექტებულმა ჟიურიმ შეადგინა. პირველ ადგილზე კი სქართველო ტურისტულმა ვებ-გვერდმა Travel Lemming დაასახელა. გამარჯვებულისთვის სპეციალური ჯილდო საქართველოს ტურიზმის ეროვნულ ადმინისტრაციას გადაეცა.
„ჩვენ, როგორც ქვეყანა ვიმყოფებოდით ლონდონში, მსოფლიოში ერთერთ მსხვილ ტურისტულ გამოფენაზე. მოხარულები ვართ რომ ჩვენ, ქვეყანაში დავბრუნდით საერთაშორისო აღიარებით და ჯილდოთი, რომლითაც საქართველო დასახელდა 2020 წლის ყველაზე მიმზიდველ მიმართულებად მთელი მსოფლიოს მასშტაბით.
აღნიშნული ჯილდო მნიშვნელოვანია, არამხოლოდ ქვეყნისთვის არამედ ეს წარმატება ასახავს იმას რომ ტურიზმის ეროვნული ადმინისტრაციის მიერ ჩატარებული მარკეტინგული აქტივობები, სხვადასხვა ღონისძიებები, კამპანიები, რომელსაც ტურიზმის ეროვნული ადმინისტრაცია 2019 წლის დასაწყისისდანვე ატარებს, არის ძალიან წარმატებული.
ეს აღიარება ნიშნავს იმას რომ საქართველოს პოზიციონირება მსოფლიოს მასშტაბით ძალიან კარგად განხორციელდა და რაც ყველაზე მნიშვნელოვანია ტურისტებს, უცხოელ ჟურნალისტებსა და ბლოგერებს აქვთ იმის სურვილი რომ საქართველოში იმოგზაურონ როგორც აღნიშნულ, ასევე მომავალ წელს“,- აცხადებს ტურიზმის ეროვნული ადმინისტრაციის ხელმძღვანელი მარიამ ქვრივიშვილი.
„საქართველო მსოფლიოს იდუმალი სამოგზაურო მარგალიტია, კომპაქტური ზომის მიუხედავად ქვეყანა გაგაოცებთ უდიდესი მრავალფეროვნებით“, -წერენ ბლოგერები, რომლებიც საქართველოში მოგზაურობის მსურველებს კავკასიონის მთების და ძველი თბილისის მონახულებას ურჩევენ.
„საქართველოს შეუძლია ძალიან ბევრი რამ შემოგთავაზოთ. მოდური დედაქალაქი, ულამაზესი მთების პეიზაჟები, ნამდვილად უგემრიელესი კერძები და ღვინო. ვფიქრობ საქართველო უახლოეს წლებში მთელ მსოფლიოში ერთ-ერთი ყველაზე პოპულარული მიმართულება გახდება“,- წერს ბლოგერი ქეით მაკკალი.
საქართველოსთან ერთად 2020 წლის სამოგზაურო სიაში შვედეთი, ესტონეთი, შვეიცარია, დომინიკის რესპუბლიკა, მექსიკა და სხვა ქვეყნები, რეგიონები და ქალაქები მოხვდნენ.
Travel Lemming 2016 წელს ამერიკელმა ნეიტ ჰეიკმა დაარასა, რომელმაც უკვე 66 ქვეყანაში იმოგზაურა. ვებ-გვერდის მიზანი ახალი, მიმზიდველი ტურისტული მიმართულებების პოპულარიზაციაა.
pia.ge
Loading ...
