საქართველოში ყველაზე მეტი სასტუმრო თბილისსა და აჭარაშია – რამდენია გურიასა და სხვა რეგიონებში

საქართველოში სასტუმროების რაოდენობა გაიზარდა. საქსტატის დეკლარირებული მონაცემების მიხედვით, 2024 წელს საქართველოში ფუნქციონირებდა სასტუმროს მომსახურებით დაკავებული 2 612 ეკონომიკური სუბიექტი, რომლებიც ფლობდნენ 2 662 სასტუმროსა და სასტუმროს ტიპის დაწესებულებას (ადგილობრივი ერთეულებისა და ფილიალების ჩათვლით). აღნიშნული მაჩვენებელი 7.0 პროცენტით მეტია 2023 წელთან შედარებით. 2023 წელს საქართველოში სასტუმროს მომსახურებით დაკავებული 2 435 ეკონომიკური სუბიექტი, რომლებიც ფლობდნენ 2 488 დაწესებულებას.

საანგარიშო პერიოდში ყველაზე მეტი სასტუმრო და სასტუმროს ტიპის დაწესებულება ფუნქციონირებდა თბილისსა (22.5 პროცენტი) და აჭარის ა/რ-ში (20.5 პროცენტი). კერძოდ, საქსტატის მონაცემებით, თბილისში ფუნქციონირებდა 599 სასტუმრო, აჭარაში – 547 ერთეული; იმერეთში – 288; კახეთში – 278; სამცხე-ჯავახეთში – 198, გურიაში – 173 და ა.შ.

ამასთან, საქსტატის მონაცემებით, სასტუმროს მომსახურებით დაკავებული ეკონომიკური სუბიექტებისათვის ყველაზე გავრცელებულ ორგანიზაციულ-სამართლებრივ ფორმას წარმოადგენდა „ინდივიდუალური მეწარმე“, რომელიც შეადგენდა 2024 წელს მოქმედი სასტუმროებისა და სასტუმროს ტიპის დაწესებულებების საერთო რაოდენობის 62.9 პროცენტს. აღსანიშნავია, რომ საანგარიშო პერიოდში სასტუმროებისა და სასტუმროს ტიპის დაწესებულებების 99.8 პროცენტი კერძო საკუთრებაში იყო, ხოლო 0.2 პროცენტი – სახელმწიფო საკუთრებაში.

2024 წელს საქართველოში მოქმედი სასტუმროებისა და სასტუმროს ტიპის დაწესებულებების საერთო ფართობი 3 610.5 ათას კვადრატულ მეტრს (2023 წლის შესაბამის მაჩვენებელზე 2.4 პროცენტით მეტს) შეადგენდა, საიდანაც უშუალოდ ნომრების საცხოვრებელი ფართი 1 616.5 ათასი კვადრატული მეტრი იყო (2023 წლის შესაბამის მაჩვენებელზე 4.1 პროცენტით მეტი).

2024 წელს მოქმედ სასტუმროებსა და სასტუმროს ტიპის დაწესებულებებში ადგილების საერთო რაოდენობამ 113.5 ათასი შეადგინა, რაც 5.3 პროცენტით მეტია 2023 წლის შესაბამის მაჩვენებელზე.ნომრების საერთო რაოდენობა 2024 წელს წინა წელთან შედარებით 2.1 პროცენტით გაიზარდა და 51.2 ათასი შეადგინა.

www.bpn.ge