საქართველოში ბავშვების დაახლოებით ნახევარი სოციალურად დაუცველთა ბაზაში ირიცხება

სახალხო დამცველის ყოველწლიური ანგარიშის მიხედვით, 2025 წლის მდგომარეობით, საქართველოში „სოციალურად დაუცველი ოჯახების მონაცემთა ერთიან ბაზაში“ 379 957 ბავშვი ირიცხებოდა, საიდანაც 23 322 პირველად დარეგისტრირდა.

დოკუმენტის მიხედვით, ქვეყანაში სიღარიბე კვლავაც ერთ-ერთ უმთავრეს გამოწვევად რჩება. ამას მოწმობს სოციალური დახმარების პროგრამაში რეგისტრირებული მოქალაქეების საერთო რაოდენობაც – 1 307 607 პირი.

ყოველი მესამე მოქალაქე მიზნობრივი სოციალური დახმარების პროგრამაშია

„ბიზნესპრესნიუსი“ დაინტერესდა, მთლიანი მოსახლეობის რა ნაწილია რეგისტრირებული სოციალურ დახმარების პროგრამაში და მათ შორის რა წილი უკავიათ ბავშვებს.

სტატისტიკის ეროვნული სამსახურის 2025 წლის 1-ელი იანვრის მონაცემებით, საქართველოს მოსახლეობის რაოდენობა 3 704 500-ს შეადგენს. შესაბამისად, გამოდის, რომ ქვეყანაში თითქმის ყოველი მესამე ადამიანი მიზნობრივი სოციალური დახმარების პროგრამის მონაცემთა ბაზაშია რეგისტრირებული.

ამავე პერიოდში ქვეყანაში 0-დან 16-წლამდე ასაკის ბავშვების რაოდენობა 760 355-ს შეადგენდა. მონაცემები აჩვენებს, რომ საქართველოში ბავშვთა დაახლოებით ნახევარი სოციალურად დაუცველთა ბაზაში ირიცხება.

წყარო: bm.ge