საქართველოს საჯარო სკოლებში ამ დროის მონაცემებით, უკრაინელი 38 მოსწავლე ჩაირიცხა, თუმცა, მიმართვა ჩარიცხვასთან დაკავშირებით 72 მოსწავლის უფლებამოსილმა პირმა გააკეთა.
ამის შესახებ “ინტერპრესნიუსს“ განათლების და მეცნიერების მინისტრის მოადგილემ, თამარ მახარაშვილმა განუცხადა.
როგორც მახარაშვილმა აღნიშნა, უკრაინელი მოსწავლეების ქართულ საჯარო და კერძო სკოლებში მიღების გამარტივებული პროცედურა მოსწავლეების დოკუმენტის გარეშე მიღებასაც გულისხმობს.
„საქართველოს მთავრობის გადაწყვეტილებით, 2022 წლის 24 თებერვლიდან ის უკრაინელი მოსწავლეები, რომლებიც ომის გამო ვერ ახერხებენ მიიღონ ზოგადი განათლება და გამოთქვამენ სურვილს, რომ სწავლა საქართველოში გააგრძელონ, გამარტივებული წესით ჩაირიცხებიან სკოლებში. მოსწავლეები კლასიდან კლასში უნდა ჩავრიცხოთ. უკრაინელი მოსწავლის ქართულ სკოლაში ჩარიცხვის საფუძველი შეიძლება გახდეს: უკრაინის მოქალაქეობის დამადასტურებელი დოკუმენტი, ცნობა უკრაინის სახელმწიფოს საზღვრის კვეთის შესახებ, პირადი საქმე, სერტიფიკატი, დიპლომი, ამონაწერი პირადი საქმიდან მატერიალური თუ ელექტრონული სახით წარმოდგენილი – ნებისმიერი დოკუმენტი, რომელიც ჩვენთვის ხელჩასაჭიდი იქნება. ამ დოკუმენტების ქონის შემთხვევაში ისინი მიმართავენ სკოლას და სკოლა გამარტივებული პროცედურით მოახდენს მათ ჩარიცხვას. თუმცა, ვითვალისწინებთ იმასაც, რომ შესაძლოა, მოსწავლეს საერთოდ არ ჰქონდეს არანაირი დოკუმენტი, ამ შემთხვევაშიც არ შევუქმნით მოსწავლეს პრობლემას, გამოვიყენებთ მოწმის სტატუსს, დადასტურების ნაწილით წავალთ და ჩავრიცხავთ სკოლებში. ყველა ბავშვი, ვინც უკრაინიდან ჩამოვა, ჩაირიცხება ნებისმიერ სკოლაში ქვეყნის მასშტაბით. ისინი არ არიან შეზღუდულები სკოლების არჩევაში.
2022 წლის 18 მარტის 17:00 საათის მდგომარეობით, განცხადებით ქართულ სკოლებში ჩარიცხვის მოთხოვნით მოგვმართა 72 მოსწავლის უფლებამოსილმა პირმა, აქედან უკვე ჩარიცხულია 38 მოსწავლე როგორც საჯარო, ასევე კერძო სკოლებში. ჩარიცხული მოსწავლეებიდან 7 მოსწავლეა თბილისში, 22 მოსწავლე – ბათუმში, 1 – ხარაგაულში, 2 -ჭიათურაში, 1 -მარნეულში, 2 -რუსთავში და 3 -ოზურგეთში. რაც შეეხება სხვა მოსწავლეებს, რომლებსაც მომართვა აქვს გაკეთებული, დარწმუნებული ვარ, ორშაბათს, სამშაბათს ყველა მოსწავლე ჩაირიცხება სასურველ სკოლაში. სტატისტიკა მუდმივად იცვლება.
კერძო სკოლებს, ჩარიცხვასთან დაკავშირებით მოგეხსენებათ, რომ განათლების სამინისტრო ვერანაირ დავალებას ვერ მისცემს. თუმცა, ჩვენ რა ინფორმაციაც გვაქვს, უკვე გამოთქვა ბათუმის ერთ-ერთმა კერძო სკოლამ მზაობა, რომ უკრაინელ 15 მოსწავლეს უფასოდ ასწავლის. თუმცა, იქიდან გამომდინარე, რომ ქვეყნის მასშტაბით 2086 სკოლაში ვაძლევთ ჩარიცხვის შესაძლებლობას ამ მოსწავლეებს, აუცილებლობა, რომ კერძო სკოლები მაქსიმალურად გამოიყენონ, არ იქნება“, – განაცხადა მახარაშვილმა.
ამასთან, განათლების და მეცნიერების მინისტრის მოადგილე განმარტავს, რომ იმ შემთხვევაში, თუ კლასში მოსწავლეთა მაქსიმალური რაოდენობაა და მოსწავლის დამატების უფლება სკოლას არ აქვს, სპეციალური კლასი ან კლას-კომპლექტები შეიქმნება და ამაზე გადაწყვეტილებას თავად სკოლები მიიღებენ.
„რაც შეეხება კლასებს და კლას-კომპლექტებს, ადმინისტრირება ამის საშუალებას ილევა. იქ, სადაც კლას-კომპლექტი იქნება საჭირო, გაკეთდება, ასევე საჭიროების შემთხვევაში დამატებით კლასიც შეიქმნება. გადაწყვეტილებას ამაზე თავად სკოლები მიიღებენ.
რაც შეეხება ბათუმის შემთხვევას, სადაც მოსწავლის მიღება კონკრეტულ კლასში ვერ მოხერხდა შევსებული ადგილების გამო, უკვე მოგვარებულია და ეს მოსწავლე სკოლაში ჩაირიცხა. საქმე იმაშია, რომ სანამ აქტი გამოიცემოდა, მანამდე მიაკითხა ამ მოსწავლემ სკოლას და გასცეს ის პასუხი, რომ კონკრეტულ კლასში 29 იყო ბავშვების რაოდენობა და ჯერჯერობით ადგილი არ ჰქონდათ. თუმცა, მას შემდეგ, რაც ნორმატიულ აქტში ცვლილება შევიდა, ამ ბავშვს მიეცა საშუალება და უკვე ჩარიცხულია მისთვის სასურველ სკოლაში. ამასთან, გასათვალისწინებელია ისიც, რომ ჩვენი ეროვნული სასწავლო გეგმის მიხედვით 1-დან მე-8 კლასის ჩათვლით შესაძლებელია კლასში მაქსიმუმ 29 ბავშვის განთავსება, ხოლო მე-9 კლასიდან ზემოთ მაქსიმუმ 35 ბავშვის განთავსება. ეს პრინციპი აქ დაცული იქნება. საჭიროების შემთხვევაში გაკეთდება როგორც კლას-კომპლექტი, ასევე ცალკე კლასი. ინსტრუქტაჟი ყველა სკოლას აქვს.
რაც შეეხება სწავლების ენის არჩევის საკითხს, ამას თავად მოსწავლე წყვეტს, რა ენაზე უნდა ისწავლოს. ამასთან, მაქვს ინფორმაცია, რომ ერთმა მოსწავლემ თავად გამოხატა სურვილი, რომ ქართულად ისწავლოს და იკითხა დაეხმარება თუ არა სკოლა ამაში, რომ ცალკე გაკვეთილები ჩაუტარდეს თავიდან და ამის გეგმას თავად სკოლა შეუდგენს.
რაც შეეხება კონკრეტულად უკრაინულ სკოლას, თუ არ ვცდები 2010 წლის შემდეგ ის აღარ ფუნქციონირებს “, – განაცხადა მახარაშვილმა.
ამასთან, მახარაშვილის ინფორმაციით, ათეულობით ზარი შევიდა უკვე მანდატურის სამსახურში უკრაინელი ბავშვებისთვის ფსიქო-სოციალური მომსახურების გაწევასთან დაკავშირებით. როგორც მახარაშვილმა აღნიშნა, ზოგიერთი მათგანი საქართველოში ჯერ ჩამოსულიც არ არის და წინასწარ რეკავს, რომ მათ მომსახურება სჭირდებათ. „ათობით ზარი გვაქვს დარეგისტრირებული უკვე. მომდევნო კვირას სტატისტიკაც გვექნება. როგორც ბავშვებს გავუწევთ ფსიქო-სოციალურ მომსახურებას, ასევე მოზარდებსაც და ჩვენი მანდატურის სამსახური ამისთვის მზად არის. თუმცა, ეს არ არის ყველაფერი, მათი საჭიროებებს ფეხდაფეხ გავყვებით და რაც შეგვეძლება ყველაფერს გავუკეთებთ“, – განაცხადა მახარაშვილმა “ინტერპრესნიუსთან“ საუბრისას.
www.interpressnews.ge
Loading ...