საქართველოს პარლამენტის თავმჯდომარემ სოფელ ლიხაურში ექვთიმე თაყაიშვილის სახლ-მუზეუმი მოინახულა

საქართველოს პარლამენტის თავმჯდომარემ შალვა პაპუაშვილმა, კოლეგებთან და ადგილობრივი ხელისუფლების წარმომადგენლებთან ერთად გურიაში ოზურგეთის მუნიციპალიტეტის სოფელ ლიხაურში ექვთიმე თაყაიშვილის სახლმუზეუმი მოინახულა. შალვა პაპუაშვილის 2023 წლის 25 მაისის ბრძანებით პირველი რესპუბლიკის დამფუძნებელი კრების თავმჯდომარე კარლო ჩხეიძე, თავმჯდომარის პირველი მოადგილე ალექსანდრე ლომთათიძე, თავმჯდომარის მოადგილეები ექვთიმე თაყაიშვილი და სვიმონ მდივანი სიკვდილის შემდეგ თავისუფლების საპარლამენტო ორდენით დააჯილდოვდნენ მათ მიერ პარლამენტარიზმის განვითარებაში  შეტანილი განსაკუთრებული წვლილისათვის. ექვთიმე თაყაიშვილის თავისუფლების საპარლამენტო ორდენი მის სახლმუზეუმს საქართველოს პარლამენტის თავმჯდომარემ პირადად გადასცა. მნიშვნელოვანია, დაფასდეს მათი ღვაწლი, როგორც  ქართული პარლამენტარიზმის  ჩამოყალიბებასა და განვითარებაში, ასევე, საქართველოს დამოუკიდებლობის და სახელმწიფოებრიობის განმტკიცებაში. მათი ხელმძღვანელობით ფუნქციონირებდა საქართველოს პირველი საკანონმდებლო ორგანო (დამფუძნებელი კრება), რომელმაც 1921 წელს საქართველოს პირველი კონსტიტუცია მიიღო. ექვთიმე თაყაიშვილი საქართველოს მართლმადიდებელმა სამოციქულო ეკლესიამ 2002 წლის 17 ოქტომბერს წმინდანად შერაცხა და ექვთიმე ღვთისკაცი უწოდა.