2025 წლის სექტემბერში საქართველომ დაასრულა რუსეთის მიმართ არსებული ისტორიული საგარეო ვალის დაფარვა. აღნიშნული ვალი წარმოადგენდა საქართველოს დამოუკიდებლობის პირველ წლებში დაგროვილ დავალიანებებს, რომელთა რესტრუქტურიზაციაც 2004 წლის ივლისში, საქართველოსა და პარიზის კლუბის კრედიტორებს შორის გაფორმებული შეთანხმებით მოხდა. აღნიშნული თანხები საერთო ჯამში მოიცავდა 160 მილიონი დოლარის პრობლემურ კრედიტებს, რომლებიც საქართველომ 1999 წლამდე ისესხა, ასევე 1999 წლიდან 2004 წლის მაისამდე აღებული ვალების პროცენტებს და იმ ვალებს, რომელთა დაფარვაც 2004-2006 წლებში უნდა დასრულებულიყო. მთლიანობაში აღნიშნული თანხები 225 მილიონ დოლარს აღემატებოდა.
ბოლო ტრანშები რომლებიც სექტემბერში განხორციელდა ქვეყნების მიმართ ასე ნაწილდებოდა – რუსეთი $4 მილიონი; თურქეთი $1.1 მილიონი; ყაზახეთი 636 ათასი დოლარი; სომხეთი 516 ათასი დოლარი; აზერბაიჯანი 586 ათასი დოლარი; ირანი 427 ათასი დოლარი;
ვალების რესტრუქტურიზაციით საქართველომ აღნიშნულ პერიოდში ფისკალური წნეხის მნიშვნელოვნად შემცირება შეძლო, რადგანაც მის ფარგლებში პრობლემური სესხების კონსოლიდაცია და მათი მომსახურების გადავადება მოხდა. ვალის დაფარვა 2011 წელს დაიწყო, ხოლო უკანასკნელი ტრანში 2025 წლის სექტემბერში განხორციელდა.
აღნიშნული საგარეო კრედიტები 2004 წლის მდგომარეობით, ანუ მათი რესტრუქტურიზაციის დროს ასე ნაწილდებოდა:
- რუსეთის ფედერაცია – 153 მილიონი დოლარი;
- თურქეთი – 53.4 მილიონი დოლარი;
- ყაზახეთი – 28 მილიონი დოლარი;
- სომხეთი – 19.6 მილიონი დოლარი;
- აზერბაიჯანი – 16.2 მილიონი დოლარი;
- ირანი – 12.8 მილიონი დოლარი.
www.bm.ge
Loading ...