სარჩელი, ემიგრანტებისთვის დამატებითი უბნების გახსნაზე, სასამართლომ არ დააკმაყოფილა

ოპოზიციის სარჩელი საქალაქო სასამართლომ არ დააკმაყოფილა. თამარ კორძაიას სარჩელი ემიგრანტებისთვის საზღვარგარეთ დამატებითი უბნების გახსნას ეხებოდა. როგორც სასამართლო გადაწყვეტილების მიღების შემდეგ თამარ კორძაიამ განაცხადა, ბიძინა ივანიშვილის დავალების შესრულებაში სხვა შტოებთან ერთად  სასამართლოც არის ჩართული

“კიდევ ერთხელ დადასტურდა, რომ ყველა შტო ჩართულია ბიძინა ივანიშვილის დავალების შესრულებაში. დღეს 28-ე დარბაზში სალომე სამხარაძემ, რომელიც არის მურუსიძის ყოფილი თანაშემწე და უვადოდ სწორედ ამ ნიშნით დაინიშნა, მიიღო გადაწყვეტილება, რომ ჩვენს ემიგრანტებს წაართვას ხმის უფლება. მან არ გააუქმა ცესკოს გადაწყვეტილება.

ხელისუფლების ყველა შტო წარმოუდგენელ საქმეებს აკეთებს იმისთვის, რომ საქართველოს მოქალაქეებმა თავისი არჩევანი ვერ გააკეთონ,” – განაცხადა კოალიცია “ერთიანობა – ნაციონალური მოძრაობის” წევრმა თამარ კორძაიამ.

გარდა ოპოზიციისა, საქალაქო სასამართლოს იგივე სარჩელით კიდევ ორმა არასამთავრობო ორგანიზაციამ მიმართა. რა გადაწყვეტილება მიიღო მოსამართლემ მათ შემთხვევაში, გადაწყვეტილება რამდენიმე უახლოეს პერიოდში უნდა გახდეს ცნობილი.

სამივე მოსარჩელე მხარე განმარტავდა, რომ იმ შემთხვევაში, თუ მოსამართლე სარჩელებს წარმოებაში არ მიიღებდა , 2024 წლის საპარლამენტო არჩევნების ლეგიტიმურობა ეჭვქვეშ დადგებოდა, რადგან ოცნების ხელისუფლება კანონს არღვევს და საზღვარგარეთ მცხოვრებ საქართველოს მოქალაქეების უდიდეს ნაწილს არჩევნებში მონაწილეობისა და ხმის მიცემის უფლებას ართმევს.