საპროტესტო აქცია სოფელ ნაბეღლავში

ჩოხატაურის მუნიციპალიტეტის სოფელ ნაბეღლავის მოსახლეობამ გამაფრთხილებელი აქცია გამართა. ადგილობრივები მაღალმთიანი დასახლების სტატუსის აღდგენას ითხოვენ. მათი თქმით, რამდენიმე წლის წინ კანონში შესული ცვლილებების საფუძველზე მეზობელ სოფელ ქვაბღასთან ერთად სტატუსი გაუუქმდათ, თუმცა მოგვიანებით ნაბეღლავისგან განსხვავებით ქვაბღას მაღალმთიანი დასახლების სტატუსი დაუბრუნეს. ნაბეღლაველების განცხადებით, აქ არსებული მკაცრი ბუნებრივი პირობების და სპეციფიკური რელიეფის გათვალისწინებით ყოველდღიური ცხოვრება დიდ სირთულეებთან არის დაკავშირებული. ზამთარში კი დიდი თოვლის გამო კი სოფელი გარესამყაროსგან ფაქტიურად იზოლირებულია. ნაბეღლაველები ხელისუფლებისგან მეტ თანადგომას ითხოვენ, რაც ამჟამად მათთვის მაღალმთიანი დასახლების სტატუსის დაბრუნებაში გამოიხატება. “თუ ასეთი უყურადღებობა გაგრძელდა, სოფელი აუცილებლად დაიცლება. ახალგაზრდები უკვე გარბიან აქედან, რადგან ცხოვრების პერსპექტივა არ არსებობს. დიდია ნაბეღლავიდან ემიგრაციაში წასულთა რაოდენობაც. ზამთარში, თუნდაც ახლა სოფელში ლამის 2 მეტრამდე სიმაღლის თოვლია. სკოლა ისეთ მაღლობზე დგას, სკოლის ავტობუსი საერთოდ ვერ მოძრაობს და ბავშვები ფეხით ცდილობენ როგორმე სკოლამდე მიაღწიონ. ჩვენთან საკარმიდამო ნაკვეთები ზღვის დონიდან 800 მეტრზე და ზევითაც გვაქვს, ასეთივე სიმაღლეზეა თხილის ბაღები და ა.შ. შესაბამისად, თუ მეტი არა, სოფელ ქვაბღაზე ნაკლებად რთული პირობები არ გვაქვს” – აცხადებენ აქციის მონაწილეები. შეხვედრაზე გაჟღერდა კომპანია “წყალი მარგებელის” საკითხიც. “ეჭვი გვაქვს, რომ მაღალმთიანის სტატუსი იმიტომ მოგვიხსნეს, რომ აქ მდებარეობს ქარხანა “წყალი მარგებელი” და ნაბეღლავს თუ სტატუსი ექნება, ეს კომპანიისთვის გადასახადებში შეღავათებს გამოიწვევს, რაც ბიუჯეტისთვის დამაზარალებელია. თუმცა აქაც არის გამოსავალი, დაყონ სოფელი ზონებად და ქვემოთ მდებარე ნაბეღლავს და ტრასასთან მიმდებარე ტერიტორიას კი არა, სოფლის მთაში მდებარე ნაწილს დაუბრუნონ სტატუსი”. როგორც ნაბეღლაველები ამბობენ, მათ ხელისუფლების სწორი რეაგირების და ვითარების შეცვლის იმედი აქვთ. ჩოხატაურის ხელისუფლებაში ამბობენ, რომ სტატუსი ნაბეღლავს 90-იან წლებში მოეხსნა. საკრებულოს თავმჯდომარე ირაკლი კუჭავა: “სოფელ ქვაბღას სტატუსი კი არ აღუდგა, არამედ მთის ახალი კანონის საფუძველზე, კონკრეტული კრიტერიუმების მიხედვით, საქართველოში მდებარე მაღალმთიან დასახლებებს აღნიშნული სტატუსი თავისი შეღავათებითურთ მიენიჭათ. მათ შორის იყო ქვაბღაც, სადაც დასახლება ზღვის დონიდან 800 მეტრზეა. ნაბეღლავში არ არის მსგავს სიმაღლეზე საკარმიდამო ნაკვეთები. კიდევ არის სხვა კრიტერიუმებიც.” როგორც კუჭავა ამბობს, თუ ნაბეღლაველებს ამ მიმართულებით მოთხოვნა და ამ მოთხოვნის საფუძველი აქვთ, ეს უფრო ნათლად უნდა აჩვენონ. “მაგ კანონსაც ადამიანები წერენ. ვითხოვთ, რომ ისე გააკეთონ, რომ ამ სტატუსის მიღება შევძლოთ”- ასეთია ნაბეღლაველების პოზიცია.