საპროტესტო აქცია ოზურგეთის სასამართლოს წინ – რას ითხოვენ შეკრებილები

დღეს ოზურგეთის რაიონული სასამართლოს წინ ნარკოდანაშაულში ბრალდებული გიორგი გოგოტიშვილის მხარდამჭერი მორიგი აქცია გაიმართა.

აქციაში მონაწილეობას გოგოტიშვილის ოჯახის წევრები და მეგობრები იღებდნენ.

დღეს სასამართლოში აღნიშნული საქმის მორიგი მოსმენა იმართება, სადაც გოგოტიშვილის დაკავებაში მონაწილე სამართალდამცველები უნდა გამოიკითხონ. ბრალდებულის ახლობლებს იმედი ჰქონდათ, რომ გოგიტიშვილს სხდომაზე დაასწრებდნენ, თუმცა ასე არ მოხდა. მიზეზად ოჯახის თქმით, უწყებამ კოვიდ-რეგულაციები და სათანადო რესურსის არქონა დაასახელა.

გიორგი გოგოტიშვილი 2021 წლის 18 აგვისტოს კურორტ ბახმაროში, კოვიდ-ტესტირების რიგში დგომისას აიყვანეს. ბრალის მიხედვით, მას 17 აბი სუბოტექსი აღმოუჩინეს. დანაშაულის დამტკიცების შემთხვევაში გოგოტიშვილს 15-25 წლამდე პატიმრობა ემუქრება.

მის ოჯახი და მეგობრები აცხადებენ,რომ გიორგი გოგოტიშვილი ნარკოტიკის მომხმარებელი არასოდეს ყოფილა. შესაბამისად, ისინი მის დაკავებას უსამართლოდ მიიჩნევენ და მოითხოვენ, რომ გოგოტიშვილი უკანონო პატიმრობიდან სასწრაფოდ გათავისუფლდეს.

კომენტარები