ვასო აბაშიძის სახელობის ახალი თეატრის ფასადიდან მსახიობ ანდრო ჭიჭინაძის მხარდამჭერი ბანერი ჩამოხსნეს წარწერით — “თავისუფლება სინდისის პატიმრებს”. მიზეზად “რუსთავი 2“-ის ახალი სატელევიზიო მუსიკალური შოუს ბანერის გაკვრა დასახელდა.
“ანდროს ბანერის რატომ ეშინიათ?! მეცინება მართლა! მე თვითონ არ ვარ საქართველოში, ისევ ანდროს მეგობრებმა წამიყვანეს გერმანიაში, სპექტაკლზე დამპატიჟეს, ამიტომ არ ვიყავი გუშინ ბავშვების გვერდზე. სიტყვებსაც ვეღარ ვპოულობ! ვამაყობ ასეთი მეგობრები რომ ჰყავს ანდროს! ვამაყობ თითოეული მათგანით! მიყვარს თითოეული მათგანი და თან მეუხერხულება, ნერვები დააწყვიტეს ამ ღირსეულ ადამიანებს. წაართვეს საქმე, პროფესია, თეატრი! ვთქვი და ასეა — სანამ ასეთი სოლიდარობა არსებობს, დიქტატურა ვერ დამყარდება! ასეთი ადამიანები, ანდროს მეგობრებს და კოლეგებს ვგულისხმობ, გვერდში რომ გყავს, რამ უნდა შემაშინოს? ვერაფერმა!”, — აცხადებს ლიკა გუნცაძე.
მანამდე, “ტვ პირველთან” საუბრისას მსახიობმა ნანკა კალატოზიშვილმა განაცხადა, რომ “აღიზიანებთ ეს ბანერი და აღიზიანებთ მისი დამცველები, იმიტომ, რომ ეს არის სოლიდარობის აქტი”.
“აი, რატომ უშლიდათ გორგასლის ხელში დროშა? მტკვარზე გადმოფენილი საქართველოს დროშა? რატომ მოუნდათ, რომ მოეხსნათ ეს დროშა? აი, სიმბოლოებსაც კი ებრძვიან — თავისუფლების სიმბოლოს, ერთგულების სიმბოლოს. ძალიან აღიზიანებდათ ეს ბანერი, ასე ვაღიზიანებთ, ვაღიზიანებთ იმიტომ, რომ არ ვნებდებით. ეს არის დაუმორჩილებლობის აქტი მათთვის და სოლიდარობის აქტი რომ არის, ამის გააზრება ეტყობა უჭირთ”, — განაცხადა მსახიობმა ნანკა კალატოზიშვილმა “ტვ პირველთან”
ვასო აბაშიძის სახელობის ახალი თეატრის ფასადიდან ანდრო ჭიჭინაძის ბანერი გუშინ ჩამოხსნეს. ამის შემდეგ კოლეგებმა და მეგობრებმა ბანერი ჯერ აივნიდან გადმოფინეს, შემდეგ კი თეატრის ფასადზე დააბრუნეს. ბოლო ინფორმაციით, ანდრო ჭიჭინაძის ბანერი ახალი თეატრის ფასადიდან კვლავ ჩამოხსნეს.
Loading ...