თავდაცის სამინისტროს ერთ-ერთ ობიექტზე წუხელ გარდაცვლილი იპოვეს თავდაცვის სამინისტროს აღმოსავლეთ სარდლობის სერჟანტი, მამუკა მელაძე. ინფორმაციას თავდაცვის სამინისტროს პრესსამსახური ავრცელებს და წერს, რომ სერჟანტმა თავი ჩამოიხრჩო. მოკლე პრესრელიზში უწყება თვითმკვლელობის სავარაუდო მიზეზად ოჯახურ კონფლიქტს მიუთითებს.
“საქართველოს თავდაცვის სამინისტროს სამხედრო პოლიციის დეპარტამენტმა სუიციდის ფაქტზე, სისხლის სამართლის 115-ე მუხლის 1-ლი ნაწილით, რაც თვითმკვლელობამდე მიყვანას გულისხმობს, გამოძიება დაიწყო.
საქმეზე გამოკითხულია მოწმეები, დანიშნულია შესაბამისი ექსპერტიზები და ტარდება საგამოძიებო მოქმედებები. გამოძიების პირველადი ინფორმაციით თვითმკვლელობა სავარაუდოდ ოჯახურ კონფლიქტს უკავშირდება” – ნათქვამია უწყების განცხადებაში.
რადიო თავისუფლება შეეცადა სამინისტროსგან გაეგო, რომელ ობიექტზე ნახეს 45 წლის სერჟანტი გარდაცვლილი – უწყება მომხდარის შესახებ დეტალებზე არ საუბრობს.
მამუკა მელაძე ღია წყაროების მიხედვით, მონაწილეობდა საქართველოს თავდაცვის ძალების საერთაშორისო მისიაში ავღანეთში.
Loading ...
