საქართველოს პრეზიდენტი სალომე ზურაბიშვილი, ევროპული საბჭოს პრეზიდენტის, შარლ მიშელის წარმომადგენლის კრისტიან დანიელსონის საქართველოში დაბრუნების შესახებ მიღებულ გადაწყვეტილებას მიესალმება. ამის შესახებ პრეზიდენტი „ტვიტერზე“ წერს.
„მადლობა ბატონო პრეზიდენტო. ეს ძლიერი ნიშანია იმისა, რომ ევროკავშირი არსად მიდის. სანამ ჩვენ ბატონი დანიელსონის დაბრუნებას ველით, კიდევ ერთხელ მოვუწოდებ ყველა მხარეს ქვეყანა პირველ ადგილზე დააყენოს და დეპოლარიზაციის, კომპრომისისა და ერთიანობისთვის იმუშაოს“, – განაცხადა სალომე ზურაბიშვილმა.
ევროპული საბჭოს პრეზიდენტის, შარლ მიშელის განცხადებით, მისი წარმომადგენელი კრისტიან დანიელსონი მედიაციის გასაგრძელებლად საქართველოში დაბრუნდება.
„შევაჯამეთ დანიელსონის მედიაციით საქართველოში მიღწეული პროგრესი. დროა, ქართველი ხალხის ინტერესებიდან გამომდინარე, გაკეთდეს აუცილებელი კომპრომისები. წარმომადგენელი მედიაციის გასაგრძელებლად დაბრუნდება“,- წერს მიშელი სოციალურ ქსელში.
Loading ...