საბერძნეთში საქართველოს მოქალაქე საზღვაო ბაზაზე ჯაშუშობის ეჭვზე დააკავეს

ბერძნული მედიის ინფორმაციით, უსაფრთხოების მაღალჩინოსნებმა განაცხადეს, რომ საბერძნეთის ხელისუფლებამ საქართველოს მოქალაქე დაკითხვის მიზნით დააკავა კრეტაზე სამხედრო-საზღვაო ბაზასთან დაკავშირებით ჯაშუშური საქმიანობის ეჭვზე.

გამოცემა ekathimerini-ს ინფორმაციით, ეჭვმიტანილ კაცს ეროვნული სადაზვერვო სამსახური (EYP) უთვალთვალებდა და ის ათენის საერთაშორისო აეროპორტში ჩასვლისთანავე დააკავეს.

მაღალჩინოსნების თქმით, გამომძიებლებმა მოიპოვეს მტკიცებულებები, რომელიც ამყარებს ეჭვს, რომ დაკავებული ჯაშუშურ საქმიანობას ეწეოდა, თუმცა, ჯერჯერობით საქმის დეტალები არ გავრცელებულა.

გამოცემა Greekcitytimes კი წერს, რომ სამართალდამცავები იძიებენ შესაძლებლობას, რომ დაკავებული სადაზვერვო ინფორმაციას ირანისთვის აგროვებდა.

ცნობისთვის, კრეტის სუდის ყურეში სამხედრო-საზღვაო ბაზა მდებარეობს, რომელიც ხმელთაშუაზღვის აღმოსავლეთში მდებარეობის გამო სტრატეგიული მნიშვნელობისაა ამერიკული ავიამზიდებისთვის. გასულ თვეს აშშ-ს ავიამზიდი USS Gerald R. Ford დროებით სწორედ ამ ბაზაზე გაჩერდა, რის შემდეგაც ცურვა ისრაელის სანაპიროს მიმართულებით გააგრძელა, სადაც ირანის წინააღმდეგ საბრძოლო მოქმედებებში ჩაერთო.