საახალწლო საჩუქრის იდეები Secret Santa-სთვის

საახალწლო სეზონი სავსეა სიურპრიზებით. გარშემო ყველგან საზეიმო განწყობაა და დღესასწაულისთვის მზადება იგრძნობა. ბოლო წლების განმავლობაში წინასაახალწლო ციებ-ცხელების განუყოფელი ნაწილია უკვე ყველასთვის კარგად ნაცნობი თამაში – “Secret Santa.” სამსახურში, სამეგობროში, ოჯახის წევრებთან – ყველა სივრცეში გვიწევს „საიდუმლო სანტას” როლი მოვირგოთ. კარგი საჩუქრის მოფიქრება მარტივი არაა. 

თუ Secret Santa-სთვის საჩუქრის იდეებს ეძებ, სწორ ადგილას მოხვდი. ჩვენ დაგეხმარებით ისეთი საჩუქრის შერჩევაში, რომელიც ადრესატს აუცილებლად გაახარებს. 

საჩუქრის შესარჩევად კარგად უნდა იცოდე ადრესატის ინტერესები. თუ საჩუქარს შენი კოლეგისთვის ეძებ, რომელსაც ახლოს არ იცნობ, ეცადე მეტი რამ გაარკვიო მასზე – რა არის მისი ჰობი, რისი კეთება უყვარს თავისუფალ დროს, ბოლო პერიოდში ხომ არ უხსენებია, რომ რაიმე კონკრეტული ნივთი სჭირდება.

დინამიკი

დინამიკი ერთ-ერთი ყველაზე პრაქტიკული საჩუქარია. ეს ნივთი რაღაც დროს ყველას გვჭირდება. თუ არ მოგვეპოვება, გვიწევს, სხვისგან ვითხოვოთ. ამიტომ, თუ აღმოაჩენ, რომ ადრესატს დინამიკი არ აქვს, შეგიძლია, ახალ წელს ამ ნივთით გაახარო. საჩუქარი ერთდროულად გამოსადეგიც იქნება და ორიგინალურიც.

ფირსაკრავი და ვინილები

თუ საჩუქრის ადრესატი მელომანია, შეგიძლია, ფირსაკრავი ან ვინილები აჩუქო. მუსიკის მოყვარულებისთვის ეს სიმბოლური და საკრალური ნივთია. ამიტომ, ფირსაკრავი/ვინილი იდეალური საჩუქარია, თუ მას მეგობარს, ოჯახის წევრს ან საყვარელ ადამიანს უძღვნი. 

აარჩიე სასაჩუქრე ვინილი ალბომის მიხედვით, რომელიც თქვენთვის, ორივესთვის სამახსოვროა. 

პოლაროიდი და ფოტო ალბომი

მოგონებების აღსაბეჭდად საუკეთესო საჩუქარია პოლაროიდი ან ფოტო ალბომი. თუ შენი მეგობარი ფოტოგრაფიით არის გატაცებული, ეს იქნება წამახალისებელი, რომ კიდევ უფრო ხშირად გადაიღოს სურათები. ამ ტიპის საჩუქრები ზრუნვას გამოხატავს, ადრესატს აგრძნობინებს, რომ მას კარგად იცნობ და შენთვის ძვირფასია. 

თავის მოვლის საშუალებები

Secret Santa-ს თამაშისას ხშირად ჩუქნიან თავის მოვლის საშუალებებს. ეს საჩუქარი ორივე სქესის წარმომადგენლისთვის გამოსადეგია. შეგიძლია, დამატენიანებელი, მზის დამცავი, სურნელოვანი თმის ზეთი, შამპუნი და კონდიციონერი, სახის ნიღაბი ან ტანის კრემი აჩუქო. ეს ნივთები ყველას გვჭირდება და გეცოდინება, რომ შენი საჩუქრის ადრესატიც აუცილებლად გამოიყენებს. 

სუნამო

თავის მოვლის საშუალებების გარდა, საჩუქრად შესანიშნავი იდეაა პარფიუმერიაც. თავის დაზღვევის მიზნით, შეგიძლია, კონკრეტულად ის სუნამო აჩუქო, რომელსაც ზუსტად იცი, რომ იყენებს. ეს საჩუქარი ერთნაირად სასიამოვნო შეიძლება იყოს როგორც ახლობელი ადამიანისთვის, ისე თანამშრომლისთვის. 

წიგნი

თუ იცი, რომ საჩუქრის ადრესატს კითხვა უყვარს, შეგიძლია, მისი საყვარელი ავტორის ახალი წიგნი აჩუქო ან თემატიკის მიხედვით შეურჩიო შესაბამისი ლიტერატურა – მხატვრული, სამეცნიერო, კომიქსი, მანგა ან თვითგანვითარების. წიგნი თითქმის ნებისმიერი ასაკის ადამიანს შეგიძლია აჩუქრო. მთავარია, იცოდე, რომ ეს ჟანრი აინტერესებს და უკვე წაკითხული არ აქვს. 

ჩანთა და საფულე

Secret Santa-ს თამაშისას კიდევ ერთი აქტუალური საჩუქარია ჩანთა და საფულე. ამ საჩუქარს პრაქტიკული დატვირთვა აქვს და თუ ადრესატის გემოვნებას კარგად იცნობ, შეგიძლია, პერსონალურიც გახადო. მაგ. მისი საყვარელი ფილმის ან ანიმაციის სურათით გაფორმებული ჩანთა ან საფულე შეგიძლია აარჩიო. 

სამკაული

სამკაულის შერჩევა სხვადასხვა ფასის ფარგლებში შეგიძლია და ნებისმიერ შემთხვევაში, გაახარებს ადრესატს. არ არის აუცილებელი, ძვირადღირებული საყურე, ბეჭედი ან ყელსაბამი აჩუქო. მთავარია, მის გემოვნებას შეესაბამებოდეს. დააკვირდი, პატარა სამკაულებს იყენებს, თუ მასიურს, სადას, ოქროსფერს, ვერცხლისფერს, რომელი ქვები უყვარს. საჩუქარიც ამის მიხედვით შეგიძლია შეურჩიო. 

ქუდი და შარფი

ზამთრის სუსხში საუკეთესო საჩუქარია ქუდი და შარფი. შეგიძლია, ერთ ფერში აურჩიო ნაქსოვი აქსესუარები, რომლებიც თებერვლის სიცივეს თბილად გადაატანინებს. 

სალაშქრო აღჭურვილობა

ლაშქრობა ერთ-ერთი ყველაზე გავრცელებული ჰობია. თუ იცი, რომ საჩუქრის ადრესატი მოლაშქრეა, შეგიძლია, საჩუქარიც ჰობის მიხედვით აურჩიო. ეს შეიძლება იყოს სალაშქრო ატრიბუტები, ჭურჭელი, დანა, ტანსაცმელი ან ფეხსაცმელი. 

შეჯამება

იმედია, ჩვენი რჩევები საჩუქრის არჩევაში დაგეხმარა. კიდევ ერთხელ, დაფიქრდი საჩუქრის ადრესატის ინტერესებსა და გემოვნებაზე. რა გაუხარდებოდა მას – ეცადე ამ კითხვით იხელმძღვანელო. მთავარია, საჩუქარი მას ერგებოდეს. სხვა ყველაფერი მეორე ხარისხოვანია.