რუსული ენერგეტიკული კომპანიის Интер Рао-ს გამგეობის წევრის, ალექსანდრა პანინას ცნობით, რუსეთმა საქართველოსა და აზერბაიჯანს საგანგებო ვითარების შემთხვევაში ელექტროენერგიის მიწოდება სთხოვა. პანინამ ამის შესახებ 15 ოქტომბერს რუსულ სატარიფო კონფერენციაზე ისაუბრა.
რუსეთი თითოეულ ქვეყანას, საჭიროების შემთხვევაში, 300 მგვტ ელექტროენერგიის მიწოდების უზრუნველყოფას სთხოვს.
“დიახ, ჩვენ ორ ქვეყანას, საქართველოსა და აზერბაიჯანს ელექტროენერგიის მიწოდების შესაძლებლობის შესახებ ვკითხეთ. ჩვენ განვიხილავთ იმპორტის ვარიანტებს და ჩვენ ვთხოვეთ ორ მეზობელ ენერგოსისტემას, ავარიული სიტუაციების შემთხვევაში მოგვაწოდონ ენერგორესურსი. თუ იქნება ავარიული რეჟიმი, მაშინ ჩვენ, სისტემის ოპერატორის მოთხოვნით, ორ ენერგოსისტემას – საქართველოსა და აზერბაიჯანს თხოვნით მივმართავთ, რომ მზად იყვნენ მოგვაწოდონ 300-300 მგვტ ელექტროენერგია”. – თქვა პანინამ.
პანინას თქმით, კომპანიას საქართველოსგან და აზერბაიჯანისგან პასუხი ჯერ არ მიუღია.
რუსული სახელმწიფო მედია ТАСС-ის თქმით, პანინამ დააკონკრეტა, რომ რუსეთის ფედერაცია ეცდება ამ საკითხს თავად გაუმკლავდეს და ელექტროენერგიის იმპორტს თავი აარიდოს, თუმცა, ავარიული სიტუაციების შემთხვევაში მეზობელ ქვეყნებს მიმართავს.
ტაბულა დაუკავშირდა ეკონომიკის სამინისტროს კითხვით, ფლობენ თუ არა ინფორმაციას რუსეთის თხოვნის შესახებ, რაზეც საზოგადოებასთან ურთიერთობის წარმომადგენელმა წერილობით გვიპასუხა, რომ ამ საკითხს 2007 წელს რუსეთიდან საქართველოში და საქართველოდან რუსეთში ავარიული სიტუაციების დროს ელექტროენერგიის მიწოდების შესახებ გაფორმებული ორი ხელშეკრულება არეგულირებს.
“საქართველოს ელექტროენერგეტიკული სისტემა ფიზიკურად არის დაკავშირებული ოთხივე მეზობელი სახელმწიფოს ელექტროენერგეტიკულ სისტემასთან. ოპერირების პროცესში, გადამცემი სისტემის ოპერატორი იღებს გადაწყვეტილებას ტრანსსასაზღვრო რეჟიმების შესახებ, მათ შორის, ამა თუ იმ სისტემასთან სინქრონულ-პარალელური, საექსპორტო/საიმპორტო, ავარიული, კუნძულოვანი ან ნულოვანი ოპერირების თაობაზე. აღნიშნული საკითხები დამატებით რეგულირდება შესაბამისი ქვეყნების სისტემის ოპერატორებთან გაფორმებული ხელშეკრულებებით. ელექტროენერგეტიკული სისტემის სპეციფიკურობიდან გამომდინარე, ეს მსოფლიოში დანერგილი, ჩვეული პრაქტიკაა.
რუსეთის შემთხვევაში, აღნიშნული რეგულირდება რუსეთის ელექტროენერგეტიკული სისტემის ოპერატორთან 2007 წელს გაფორმებული ორი ხელშეკრულებით: რუსეთიდან საქართველოში და საქართველოდან რუსეთში ავარიული სიტუაციების დროს ელექტროენერგიის მიწოდების შესახებ.
საქართველოს ელექტროგადამცემი ქსელი, საბჭოთა კავშირის დროს ისეა დაპროექტებული, რომ გულისხმობს საქართველოს ოპერირებას რუსეთის სინქრონულ რეჟიმში. საქართველოს ხელისუფლება და საქართველოს ეკონომიკისა და მდგრადი განვითარების სამინისტრო, აქტიურად ახორციელებს საქართველოს ელექტროენერგეტიკული სისტემის დივერსიფიკაციისა და ენერგოუსაფრთხოების გაზრდისკენ მიმართულ თანმიმდევრულ ნაბიჯებს, რომელთა შორისაა შავი ზღვის წყალქვეშა კაბელის პროექტი და გადამცემი ინფრასტრუქტურის გაძლიერების სხვა მრავალი ინიციატივა. აღნიშნული პროექტები ხელს შეუწყობს ჩვენი ქვეყნის ენერგოუსაფრთხოებისა და ენერგოდამოუკიდებლობის გაზრდას და შეამცირებს ერთ კონკრეტულ წყაროზე დამოკიდებულებას”. – გვითხრეს სამინისტროში.
Loading ...
