რუსეთის უკრაინაში შეჭრის შემდეგ, საქართველოში უკრაინიდან, რუსეთიდან და ბელარუსიდან შემოსული ხალხის რაოდენობა მკვეთრად გაიზარდა, ასევე გაზრდილია მათი ვიზიტების საშუალო ხანგრძლივობაც.
საქართველოს ეროვნული ბანკის მიერ მომზადებული თვის მიმოხილვის თანახმად, 31 ივლისის მდგომარეობით საქართველოში უცხო ქვეყნის 240,657 მოქალაქე იმყოფებოდა. აქედან რუსეთიდან შემოსული ვიზიტორების რაოდენობამ 94,894, უკრაინიდან 22,863, ბელარუსიდან 21,757 შეადგინა, რაც ჯამურად ომამდელ დონეს 6.5-ჯერ აღემატება.
აღსანიშნავია ისიც, რომ მოგზაურობიდან მიღებული შემოსავლები ეტაპობრივად კრიზისამდელ დონეს დაუბრუნდა და 2019 წლის ივლისის 120% შეადგინა. მოგზაურობიდან მიღებული შემოსავლების ზრდა ძირითადად რუსეთიდან, თურქეთიდან და ბელარუსიდან შემოსავლების მატებას უკავშირდება
რაც შეეხება ფულად გზავნილებს, ძირითად წყაროს ივლისში რუსეთი იყო მთლიან გზავნილებში 33%-იანი წილით. ივლისში რუსეთიდან $101 მილიონი გადმოირიცხა, რაც წინა წელთან შედარებით 2.5-ჯერ მეტია.
ივლისში კიდევ ერთი მიმართულება, სადაც რუსეთი ლიდერობდა იმპორტია. ძირითადი სავაჭრო პარტნიორი ქვეყნებიდან იმპორტის ზრდაში მაღალი წვლილით სწორედ რუსეთი გამოირჩეოდა, რაც, ნავთობისა და ნავთობპროდუქტების შემოტანას უკავშირდება. რუსეთზე მოდის საქართველოს მთლიანი იმპორტის 15%.
შეგახსენებთ, „საერთაშორისო გამჭვირვალობა – საქართველოს“ (TI) კვლევის თანახმად, 2022 წლის იანვარ-ივნისში საქართველომ რუსეთიდან ფულადი გზავნილებით, ტურიზმით და ექსპორტით დაახლოებით, 1.2 მლრდ აშშ დოლარის შემოსავალი მიიღო, რაც 2021 წლის ანალოგიურ შემოსავალზე 2.5-ჯერ მეტია და 36%-ით აჭარბებს პანდემიამდელი 2019 წლის იანვარ-ივნისში რუსეთიდან მიღებულ შემოსავალს.
ამასთან, ომის დაწყების შემდეგ, მარტი-ივნისის პერიოდში რუსეთის მოქალაქეებმა საქართველოში 6,400-მდე კომპანია დაარეგისტრირეს. ასობით კომპანიას იურიდიულ მისამართად საქართველოს სხვადასხვა სოფელი აქვს მითითებული.
Loading ...
