რუსეთის სულ მცირე ოთხ რეგიონში – ბურიატიაში, სტავროპოლის მხარეში, ასტრახანსა და მაგადანის რეგიონებში – შეიძლება მიიღონ კანონები, რომლებითაც ნებადართული იქნება უსახლკარო ცხოველების დახოცვა. ამის შესახებ გამოცემა „ვედომოსტი“ წერს, 52 რეგიონული პარლამენტის პასუხებზე დაყრდნობით.
2023 წლის ივლისში რუსეთის რეგიონებს მიეცათ უფლება, თავად გადაწყვიტონ, რა მოუხერხონ მაწანწალა ცხოველებს: გააგრძელონ ფედერალური პროგრამის (დაჭერა-სტერილიზაცია-ვაქცინაცია-დაბრუნება) განხორციელება თუ დაამტკიცონ თავიანთი მეთოდები.
სექტემბერში მაგადანის რეგიონის გუბერნატორმა სერგეი ნოსოვმა ადგილობრივ პარლამენტს წარუდგინა კანონპროექტი, რომელიც ითვალისწინებს ცხოველების დახოცვას “დროებითი მოთავსების პუნქტებში”.
სტავროპოლის ტერიტორიაზე განიხილება კანონპროექტი, რომელიც “არამოტივირებული აგრესიული” უსახლკარო ცხოველების დახოცვის საშუალებას იძლევა.
ასტრახანის რეგიონის დუმაში აცხადებენ, რომ განიხილავენ წინადადებებს უსახლკარო ცხოველების მკურნალობის, მათ შორის „მათი ევთანაზიის“ შესახებ.
ბურიატიის ხელისუფლებამ ივლისში განაცხადა, რომ დაუშვებენ მაწანწალა ცხოველების დახოცვას.
ცხოველთა უფლებების დამცველები, საზოგადოების წარმომადგენლები და კულტურის მოღვაწეები აქტიურად ეწინააღმდეგებოდნენ კანონპროექტს, რომელიც უსახლკარო ცხოველების დახოცვის უფლებას იძლევა. რუსეთის ათობით ქალაქში საპროტესტო აქციები გაიმართა, მოსკოვში კი აქციის მონაწილეები რამდენჯერმე შეიკრიბნენ პრეზიდენტის ადმინისტრაციის შენობასთან. კანონის წინააღმდეგ პეტიციას ხელი მოაწერა 136 ათასზე მეტმა ადამიანმა.
ექსპერტები ამტკიცებენ, რომ მაწანწალა ცხოველების მოკვლა ცხოველებისადმი პასუხისმგებლობიანი მოპყრობის შესახებ რუსეთის ფედერალური კანონის სულისკვეთებას ეწინააღმდეგება.
წყარო – რადიო თავისუფლება
Loading ...