როსტოვის ოლქში ჩამოვარდა რუსეთის კიდევ ერთი მოიერიშე SU-25, მფრინავი დაიღუპა

სამშაბათს როსტოვის ოლქში ჩამოვარდა რუსეთის სამხედრო თვითმფრინავი SU-25. მფრინავი დაიღუპა.

თავდაპირველად იტყობინებოდნენ, რომ მოიერიშე თვითმფრინავმა ავარია განიცადა, როცა ელექტროგადამცემი ხაზის საყრდენს გამოედო. მოგვიანებით სამხრეთის სამხედრო ოლქის პრესსამსახურმა ავარიის მიზეზად „ტექნიკური გაუმართაობა დაასახელა“. „რია ნოვოსტი“ აზუსტებს, რომ თვითმფრინავი დაიღუპა „გეგმური სასწავლო-საწვრთნელი ფრენის დროს“.

მანამდე, 17 ივნისს, რუსეთის ფედერაციის საჰაერო-კოსმოსური ძალების კიდევ ერთმა SU-25-მა განიცადა ავარია ბელგოროდის ოლქში. მფრინავმა მოასწრო კატაპულტირება. დასავლეთის სამხედრო ოლქის პრესსამსახურში ასევე განაცხადეს, რომ მოიერიშის ჩამოვარდნის სავარაუდო მიზეზი იყო ტექნიკური გაუმართაობა.

SU-25 საბჭოთა ქვებგერითი სამხედრო თვითმფრინავია, რომელიც 80-იანი წლების დამდეგს გამოჩნდა არმიის შეიარაღებაში. ის განკუთვნილია სახმელეთო ჯარების მხარდაჭერისთვის ბრძოლის ველის თავზე და განსაზღვრული კოორდინატებით ობიექტების განადგურებისთვის.

მოიერიშე დღემდე არის რუსეთის არმიის შეიარაღებაში და აქტიურად გამოიყენება უკრაინაში მიმდინარე საბრძოლო მოქმედებებში. პროექტ Aviation Safety Network-ის თანახმად, რომელიც საავიაციო ავარიებს აკვირდება, უკრაინის ტერიტორიაზე რუსეთის შეჭრის შემდეგ რუსეთმა 11 ასეთი თვითმფრინავი დაკარგა. ამ ინფორმაციის ოფიციალური დადასტურება არ მოიპოვება.

www.radiotavisupleba.ge