როდის უნდა დაჯავშნოთ ფრენა, რომ რეისის გაუქმებისა და გადადების შემთხვევა აიცილოთ

რჩევები,  რომელთა გათვალისწინებაც  ფრენის გაუქმებისა და გადადების არასასიამოვნო შემთხვევების თავიდან აცილებაში დაეხმარებათ:

1.როგორც ამერიკელი ბორტგამცილებელი, კრისტი კოერბელი გვირჩევს, რეისის გადადებისა და გაუქმების რისკს მნიშვნელოვნად შეამცირებთ, თუ ბილეთის ყიდვისას არჩევანს თქვენთვის სასურველ დღეს ჩანიშნულ პირველივე ფრენაზე შეაჩერებთ.

სტატისტიკური მონაცემები აჩვენებს, რომ დილის 7-დან 8 საათამდე ჩანიშნული ფრენების 90%-ი არასდროს უქმდება.  სამაგიეროდ,  საღამოს საათებში (18:00-18:59)  დაგეგმილი რეისების უმეტესობა ხშირად რამდენიმე საათით აგვიანებს ან უქმდება.

2. ასევე, კრისტი  კოერბელის თქმით, უმჯობესია  უპირატესობა პირდაპირ რეისებს მიანიჭოთ. თუმცა, იმ შემთხვევაში, თუ ფრენისას რამდენიმე აეროპორტის გამოცვლა მაინც გიწევთ, მაშინ უნდა ეცადოთ რეისებს შორის, 3 საათიანი შუალედი მაინც გქონდეთ.

3. ფრენის გაუქმებისა და გადადების ალბათობას მნიშვნელოვნად შეამცირებთ, თუ არჩევანს პატარა აეროპორტებზე შეაჩერებთ, რადგან ისინი ნაკლებადაა გადატვირთული. ბოლო მონაცემებით,  მიმდინარე წელს  ყველაზე ნაკლები რეისი  ბერგამოს  გრან-კანარიისა და ოტოპენის აეროპორტებში გაუქმდა.  სამაგიეროდ, აპრილ-ივნისის მონაცემებით, ყველაზე მეტი  – 14,200 რეისი გაუქმდა ან გადაიდო ამსტერდამის შიფჰოლის აეროპორტში. ჩამონათვალში მეორე და მესამე ადგილს იკავებენ ფრანკფურტისა და ლონდონის ჰითროუს აეროპორტები.

4.ეცადეთ ფრენა შუა კვირაში დაგეგმოთ, რადგან ამ დროს რეისებზე მოთხოვნა გაცილებით მცირეა. ამის მიზეზი ისაა, რომ ადამიანების უმეტესობა სამოგზაუროდ არჩევანს უქმე დღეებზე აჩერებს.  ასევე, კვლევები აჩვენებს, რომ ზაფხულში ფრენების მხრივ ყველაზე გადატვირთული თვე ივლისია. ამ დროს რეისების რიცხვი საგრძნობლად მაღალია, რაც ხშირად მათ დროებით გადადებას ან სულაც გაუქმებას იწვევს.

5.ავიაბილეთების ფასი ყველაზე დაბალი სამშაბათს, ოთხშაბათსა და ხუთშაბათსაა.  საქმე ისაა, რომ ადამიანები ბილეთების დაჯავშნისას იშვიათად ირჩევენ ამ დღეებს. შესაბამისად, როდესაც ბილეთების შეძენას გადაწყვეტთ, არჩევანი სამშაბათზე, ოთხშაბათსა და ხუთშაბათზე შეაჩერეთ.