ჯანდაცვის მინისტრის მოადგილე თამარ გაბუნია ჯერ ვერ ამბობს საქართველოში როდის იქნება ხელმისაწვდომი ფაიზერის კორონავირუსის საწინააღმდეგო აბები, თუმცა ამბობს, რომ ამ მიმართულებით მუშაობა უკვე დაწყებულია.
“ძალიან კარგია ის, რომ გუშინ აშშ-ს წამლისა და საკვების სააგენტომ გადაუდებელი ავტორიზაცია მისცა კონკრეტულად კორონავირუსის წინააღმდეგ მიმართულ მედიკამენტს. ეს იმედისმომცემი სიახლეა. მუშაობა დაწყებული გვაქვს და მოკლე ხანში შესაძლებლობა გვექნება საზოგადოებას გავაცნოთ ის დეტალები, თუ როდის იქნება კონკრეტულად ეს მედიკამენტი ხელმისაწვდომი. ამ მედიკამენტის გამოყენება სახლის პირობებშიც ხდება, რადგან მომხმარების პროცესში განსაკუთრებული ზედამხედველობა არ სჭირდება. უმჯობესია მედიკამენტის იმ პაციენტებზე გამოყენება მოხდეს, რომელთაც პროგნოზულად უფრო მაღალი რისკი აქვთ. იმედისმომცემია ის შედეგები, რასაც კვლევის შედეგად ეს მედიკამენტი აჩვენებს ჰოსპიტალიზაციის შემცირების თვალსაზრისით და რა თქმა უნდა, ამას შემდეგ თან ახლავს გართულებებისა და ლეტალობის შემცირებაც”,-აცხადებს გაბუნია.
როგორც ჟურნალისტებს გაბუნიამ უთხრა, ვაქცინების მსგავსად, ჯერჯერობით ამ წამლის კომერციულად გაყიდვა შეუძლებელია. “როგორც ვაქცინის ხელმისაწვდომობა ჯერჯერობით არ ხდება კომერციულ საფუძველზე, ასევე კოვიდის მედიკამენტების დაფარვა სრულად სახელმწიფოს მიერ ხდება”,-აცხადებს გაბუნია და დასძენს, რომ ვერცერთი მედიკამენტი ვაქცინას ვერ შეცვლის.
“ვაქცინა აუცილებელი პირობაა იმისთვის, რომ ჩვენ დავიცვათ პირები ინფექციის გადაცემისგან, გართულებებისგან, ჰოსპიტალიზაციისგან და რაც ყველაზე მთავარია გარდაცვალებისგან. მედიკამენტი ვაქცინას ვერ ჩაანაცვლებს”.
ალერგოლოგ-იმუნოლოგი ბიძინა კულუმბეგოვი დარწმუნებულია, რომ ეს მედიკამენტი მომავალი წლიდან საქართველოშიც ხელმისაწვდომი იქნება. ექიმი ამბობს, რომ შეუძლებელია ამ მედიკამენტმა ვაქცინაცია ჩაანაცვლოს.
“ვაქცინაცია არის პრევენცია და ეს პრეპარატი არავითარ შემთხვევაში პრევენცია არ არის. ეს წამალი განკუთვლინილია მსუბუქი და საშუალო სიმძიმის პაციენტებისთვის, რომელთაც სიკვიდილისა და ჰოსპიტალიზაციის მაღალი რისკი აქვთ და არა ყველა დაავადებულისთვის. ამიტომ, დაავადება თავიდან რომ ავიცილოთ, ყველაზე მარტივი პრევენციული საშუალება ვაქცინაციაა”,-ამბობს კულუმბეგოვი.
FDI-მ (აშშ-ს წამლის და საკვების სააგენტო) Covid-19-ის საწინააღმდეგო აბებს ავტორიზაცია მიანიჭა. მედიკამენტი, რომელიც Covid-19-ის განვითარების მაღალი რისკის მქონე ადამიანებისთვისაა რეკომენდებული, პაციენტებისთვის უკვე შაბათ-კვირიდან იქნება ხელმისაწვდომი.
Loading ...