როდის და რა მიმართულებებზე დაიწყება ახალი მაგისტრალების მშენებლობა საქართველოში

ინფრასტრუქტურის მინისტრს რევაზ სოხაძეს გუშინ პარლამენტში ინტერპელაციის წესით მოუსმინეს. საკანონმდებლო ორგანოში გამოსვლისას მინისტრმა მიმდინარე და დაგეგმილ პროექტებზე ისაუბრა.

რევაზ სოხაძეს ყველაზე მეტი კითხვა საგზაო ინფრასტრუქტურის მიმართულებით დაუსვეს. საუბარი შეეხო როგორც აღმოსავლეთ, ისე დასავლეთ საქართველოს მიმართულებით ჩქაროსნულ მაგისტრალებსა და თბილისის შემოვლით გზას.

„ბიზნესპრესნიუსი“ მინისტრის პასუხებზე დაყრდნობით, ავრცელებს პროექტების შესახებ ინფორმაციას:

• თბილისის შემოვლითი გზა

როგორც რევაზ სოხაძემ განმარტა, თბილისის შემოვლითი გზის 48- კილომეტრიან მონაკვეთზე სატენდერო პროცედურები 2025 წელს დაიწყება, ხოლო გზის სამშენებლო სამუშაოების ნაწილის დაწყება 2026 წლის ბოლოსთვისაა დაგეგმილი. მისივე თქმით, გზის ნაწილის მშენებლობა ბიუჯეტის დაფინანსებით მოხდება, ნაწილს კი დონორები დააფინანსებენ.

ამასთან, რევაზ სოხაძემ აღნიშნა, რომ თბილისის შემოვლითი გზის მშენებლობა 4 ლოტად არის დაყოფილი, თითოეულ ლოტზე კი დეტალური პროექტი მომზადებულია.

„2025 წელს დაიწყება სატენდერო პროცედურები ლოტი #2-სა და ლოტი #3-ზე. ლოტი #2 და ლოტი #3 ეს არის წიწამურიდან უკვე ახალი მაგისტრალის მშენებლობა. ხოლო ლოტი #4-სა და ლოტი #5-ზე 2026 წლის ბოლოს დავიწყებთ სამშენებლო სამუშაოებს. ეს უკვე არის ლილოს კვანძი და ლოჭინის კვანძი. აქ ჩვენ დონორებთან ვმუშაობთ და დონორების მიერ მოხდება აღნიშნული მე-4 და მე-5 ლოტის დაფინანსება. ხოლო მე-2 და მე-3 ლოტს ბიუჯეტის სახსრებით გავაკეთებთ“, – განაცხადა რევაზ სოხაძემ.

• სამტრედია-გრიგოლეთის საავტომობილო გზა

სამტრედია-გრიგოლეთის საავტომობილო გზის მონაკვეთის დასრულებასთან დაკავშირებით ინფრასტრუქტურის მინისტრმა განაცხადა, რომ პირველი 6-კილომეტრიანი მონაკვეთი უახლოეს კვირებში, მომდევნო 6 კი მომდევნო წლის მეორე კვარტალში გაიხსნება. მისივე თქმით, ამით სამტრედია-გრიგოლეთის საავტომობილო გზა სრულად დასრულება.

• სამტრედია-ზუგდიდის მიმართულებით მაგისტრალური გზა

დაგეგმილია სამტრედია-ზუგდიდის მიმართულებით 75 კმ-იანი მაგისტრალური გზის მშენებლობაც. როგორც რევაზ სოხაძემ აღნიშნა ახალი ავტომაგისტრალი 4-ზოლიანი იქნება.

მისივე ინფორმაციით, გზის ტექნიკურ-ეკონომიკური დასაბუთების დოკუმენტები მომზადებულია და დაგეგმილია დეტალური პროექტირების შემუშავება.

„აღნიშნული მაგისტრალის სამტრედია-ცაცხვის მონაკვეთის 4-ზოლიანი, ასევე 4-ზოლიანი ცაცხვი-რუხის მონაკვეთის სამუშაოებს ჩვენ აუცილებლად დავიწყებთ. იქამდე დაიწყება ანაკლიის პორტთან მისასვლელი გზის სამუშაოები“ – განაცხადა მინისტრმა.

• ქვეშეთი-კობის საავტომობილო გზის პროექტი

როგორც მინისტრმა განმარტა, ქვეშეთი-კობის საავტომობილო გზის გუდაურამდე მონაკვეთი 2026 წლის პირველ ნახევარში გაიხსნება და მოსახლეობა შეძლებს, რომ ისარგებლოს ახალი გზით.

რევაზ სოხაძის თქმით, ამავე პერიოდში დასრულდება 9-კილომეტრიანი გვირაბისა და მისასვლელი გზების მშენებლობაც. როგორც მინისტრმა აღნიშნა, პროექტის ფარგლებში აშენდება უნიკალური, თაღოვანი ხიდიც, რომლის მსგავსი სირთულის საინჟინრო კონსტრუქციას აღმოსავლეთ ევროპაში ანალოგი არ აქვს.

• გორამდე 6-ზოლიანი მაგისტრალი

რევაზ სოხაძის ინფორმაციით, გორამდე ავტომაგისტრალი შესაძლოა, 6-ზოლიანი გახდეს. როგორც ინფრასტრუქტურის მინისტრმა აღნიშნა, დაგეგმილია გზის გაფართოებისთვის ტექნიკურ-ეკონომიკური დოკუმენტებისა და პროექტის მომზადება.

• თბილისის შემოსასვლელ-გასასვლელი გზების გაფართოება

მინისტრის თქმით, ასევე იგეგმება თბილისის შემოსასვლელ-გასასვლელი გზების გაფართოება. კერძოდ, როგორც რევაზ სოხაძემ აღნიშნა, თბილისი-ნატახტრის 11-კილომეტრიან მონაკვეთზე, მაგისტრალის არსებული 4-ზოლიანი გზა, 8-ზოლიანი გახდება. ქოშიგორას ქვეშ კი ორი ახალი პარალელური გვირაბი აშენდება. მინისტრის თქმით, უწყებამ შესაბამისი სკოპინგის ანგარიში გარემოსდაცვითი ზედამხედველობის დეპარტამენტს უკვე წარუდგინა.

• ბათუმი-სარფის 11.3 კმ-იანი ორ-ზოლიანი მაგისტრალი

მინისტრის ინფორმაციით, ბათუმი-სარფის 11.3 კმ-იანი ორ ზოლიანი მაგისტრალის მშენებლობა 2026 წელს იგეგმება. როგორც რევაზ სოხაძემ განმარტა, ამ ეტაპზე გამოცხადებულია ტენდერი საზედამხედველო კომპანიის შერჩევაზე, ხოლო მშენებლობაზე ტენდერი გამოცხადდება 2025 წლის ნოემბერში.

მისივე თქმით, ასევე, დაგეგმილია ქობულეთის შემოვლითი გზის 31 კმ-იანი მონაკვეთის ოთხზოლიან მაგისტრალად მოდერნიზება, რომელიც, სავარაუდოდ, 2027 წელს დაიწყება.

• აღმოსავლეთის ჩქაროსნული ავტომაგისტრალი

აღმოსავლეთის ჩქაროსნულ ავტომაგისტრალთან დაკავშირებით მინისტრმა განაცხადა, რომ ბადიაური–ბაკურციხის 31.7 კმ-იანი ოთხზოლიანი გზის მშენებლობა 2027 წლიდან დაიწყება, ამ დროისთვის კი მიმდინარეობს შესაბამისი გეგმების განახლება.

მისივე თქმით, ასევე იგეგმება გურჯაანი-თელავის 36.6 კმ-იანი და წნორი-ლაგოდეხის 40.4 კმ-იანი მონაკვეთების პროექტირება.

 

„ბიზნესპრესნიუსი“