ქუთაისის საერთაშორისო აეროპორტის ასაფრენ-დასაფრენი ზოლის სარეაბილიტაციო სამუშაოები დასასრულს უახლოვდება. აეროპორტი მგზავრების მიღებას 31 ოქტომბრის 01:00-დან განაახლებს. ინფორმაციას ამის შესახებ აეროპორტების გაერთიანება ავრცელებს.
“რეაბილიტაციის პროცესში მოხდა ასფალტობეტონის საფარის დაზიანებული ადგილების ფრეზირება. საფუძველზე, სადაც ყველაზე მეტად იყო ბეტონის ფილები დაზიანებული, მოხდა ფილის დემონტაჟი. ამავე ფართზე გამაგრდა საფუძველი ცემენტნარევი ქვიშა ღორღით. ასაფრენ-დასაფრენი ზოლის შუა ნაწილში ორ ფენად დაიგო 80მმ სისქის მსხვილმარცვლოვანი ასფალტობეტონის საფარი. ასევე, ასაფრენ-დასაფრენი ზოლის ცენტრალურ უბანზე წვრილმარცვლოვანი მოდიფიცირებული ასფალტობეტონის 50მმ სისქის საფარი გაკეთდა. 30 ოქტომბერს ქუთაისის აეროპორტის ასაფრენ-დასაფრენი ზოლის მარკირება დასრულდება”, – იტყობინება საქართველოს აეროპორტების გაერთიანება.
შეგახსენებთ, ქუთაისის საერთაშორისო აეროპორტი ასაფრენ-დასაფრენი ზოლის რეაბილიტაციის გამო დროებით 10 ოქტომბერს დაიხურა, რის გამოც ბოლო სამი კვირაა ქუთაისიდან შესასრულებელი ფრენები თბილისის აეროპორტიდან ხორციელდება.
ცნობისთვის, ქუთაისის აეროპორტის გეგმიურ სააეროდრომო რეაბილიტაციასთან დაკავშირებით აეროპორტების გაერთიანებამ 8 მლნ ლარის ღირებულების ტენდერი გამოაცხადა. რეაბილიტაცია სრულად კომპანიის შემოსავლებით განხორციელდება.
Loading ...