საქართველოში მართვის მოწმობის ასაღებად მოქალაქეს გამოცდების ჩაბარება რამდენიმე ეტაპად უწევს. თითოეულ ეტაპზე გასასვლელად აპლიკანტი სხვადასხვა ოდენობის თანხას იხდის.
როგორც მომსახურების სააგენტოს ვებ გვერდზე გამოქვეყნებულ ინფორმაციაში ვკითხულობთ, B კატეგორიის სატრანსპორტო საშუალების მართვის უფლების მისაღებ თეორიულ გამოცდაზე პირველადი გასვლის საფასური არასრულწლოვანისთვის 15, სრულწლოვნებისთვის კი 55 ლარს შეადგენს. ყოველი შემდეგი გასვლის შემთხვევაში საფასური 40 ლარია.
როგორც უკვე ყველასთვის ცნობილია, B კატეგორიის სატრანსპორტო საშუალების მართვის უფლების მისაღები პრაქტიკული გამოცდები ორ ეტაპად ბარდება.
კანდიდატს თეორიული გამოცდის წარმატებით ჩაბარებიდან 7 დღის განმავლობაში პრაქტიკულ გამოცდაზე გასვლა უფასოდ შეუძლია. 1-კვირიანი ინტერვალის გასვლის შემდეგ, გამოცდაში მონაწილეობის ღირებულება 31 ლარს შეადგენს.
რაც შეეხება პრაქტიკული გამოცდის მეორე ეტაპს, გეგმიური გასვლის საფასური 90 ლარია, არაგეგმიური კი 250 ლარი.
თუ მართვის მოწმობის დაჩქარებული წესით დამზადებას მოისურვებთ, 1 სამუშაო დღეში მოწმობის დამზადების საფასური 50 ლარია, 2 სამუშაო დღეში – 40 ლარი.
მნიშვნელოვანია, გავითვალისწინოთ ისიც, თუ რა ჯდება გამოცდებისთვის მომზადება.
თუ ავტოსკოლების მიერ შემოთავაზებულ სერვისებს გადავავლებთ თვალს, ვნახავთ, რომ თეორიის შემსწავლელი კურსის საშუალო ღირებულება 130-150 ლარია. რაც შეეხება პრაქტიკულ ნაწილს, 50 ლარი ღირს როგორც მოედნის, ისე ქალაქის გამოცდისთვის მოსამზადებელი 1 გაკვეთილი.
როგორც ავტო ინსტრუქტორები „ბიზნესპრესნიუსთან“ საუბრისას აცხადებენ, მოედნის ელემენტების ასათვისებლად მოსწავლეს მინიმუმ 5, ქალაქში მოძრაობის სწავლისთვის კი, მინიმუმ 10 გაკვეთილი სჭირდება.
გამომდინარე აქედან, თუ მართვის მოწმობის აღების მსურველი გაკვეთილების მინიმალურ რაოდენობაში შეძლებს მომზადებას, ისარგებლებს უფასო სერვისებითაც და გამოცდებზე გეგმიურ გასვლებს მოახერხებს, „ბიზნესპრესნიუსის“ დათვლებით, მას მართვის მოწმობის აღებაში, მინიმუმ, 895 ლარი დაეხარჯება.
Loading ...