რა შემთხვევაში შეეხება რუსული კანონი ემიგრანტებს ან სხვა ფიზიკურ პირებს, თუ „ქართული ოცნება“ საზოგადოების წინააღმდეგობის მიუხედავად, მაინც მიიღებს ღირსების შემლახავ კანონს, საკუთარი მოქალაქეების წინააღმდეგ?
საქართველოს პარლამენტის დამოუკიდებელი წევრი თამარ კორძაია ამბობს, რომ თუ „უცხო ქვეყნის გავლენის აგენტის“ შესახებ კანონი ხელისუფლებამ მაინც დაამტკიცა და ისეთივე გაგრძელება მიიღო, როგორც რუსეთში, „აგენტის“ სახელით დევნის ობიექტი გახდებიან არა მარტო მედია და არასამთავრობო ორგანიზაციები, არამედ ფიზიკური პირებიც, ვინც ევროკავშირის წევრი ქვეყნებიდან მიიღებს თანხას, თუნდაც საკუთარი ოჯახის წევრისგან.
„დღეს შემოთავაზებული ვარიანტით, „უცხოეთის გავლენის აგენტი“ ჯერჯერობით იურიდიული პირია, მაგრამ თუ მომავალში ეს გავრცელდება ფიზიკურ პირზე, ისევე როგორც რუსეთში მოხდა, ამ შემთხვევაში ფიზიკური პირი, რომელიც არ არის საქართველოს მოქალაქე და გადმოურიცხავს კონკრეტულ ფიზიკურ პირს ფულს, ეს კანონი გავრცელდება მასზეც“, – ამბობს თამარ კორძაია.
მისი თქმით, უცხო ქვეყნის გავლენის აგენტად შესაძლოა იმ შემთხვევაშიც გამოცხადდეს ფიზიკური პირი, თუ მას ოჯახის წევრი ჩამოურიცხავს თანხას უცხოეთიდან, მაგრამ ამ ოჯახის წევრს აქვს სხვა ქვეყნის მოქალაქეობა.
„ასეთი შეიძლება იყოს ძალიან ბევრი ადამიანი, რადგან ეთნიკური ქართველები, რომლებიც დიდი ხანია საზღვარგარეთ ცხოვრობენ, შესაძლოა აღარ არიან საქართველოს მოქალაქეები. თუ ისინი გადმორიცხავენ ფულს, ჩაითვლებიან უცხო ძალად ამ კანონის მიხედვით.
ასე მოხდა რუსეთში, როცა 2020 წელს შევიდა კანონში ცვლილება და „უცხოურ აგენტებს“ გაუთანაბრეს ფიზიკური პირებიც და „აგენტად“ წოდებულ პირებთან აფილირებული პირებიც კი“, – ამბობს კორძაია.
უცხო ქვეყნის გავლენის აგენტის კანონი რუსეთში იმ პირებზეც კი გავრცელდა, რომლებიც სოციალურ ქსელებში აქტიურობდნენ.
„ეს აუცილებლად მივა ინტერნეტის დაბლოკვამდეც. ზუსტად ასე დაიწყო რუსეთში 2012 წელს, მაგრამ შემდეგ, კანონის ხარვეზის გამოსწორების და კანონის აღსრულების მიზნით პერიოდულად შეჰქონდათ ცვლილებები“, – ამბობს კორძაია.
რუსული კანონპროექტის მიხედვით, იურიდიული პირი, რომელიც ფინანსდება დონორი ორგანიზაციებისგან და არ დარეგისტრირდება, როგორც „უცხო ქვეყნის გავლენის აგენტი“, 25 ათასი ლარით დაჯარიმდება.
„რა მოხდება მაშინ, თუ გადაიხდის ამ ჯარიმას ორგანიზაცია და მაინც არ დარეგისტრირდება აგენტად? აი, ასეთ შემთხვევაში, ხელისუფლება იტყვის, რომ კანონის გამკაცრების მიზნით უნდა შეიტანოს ცვლილება და ასე ნაბიჯ-ნაბიჯ მივა ყველაფერი ფიზიკურ პირებამდეც.
და ეს იქნება ნებისმიერი პირი, რომელიც კრიტიკულ მედიასაშუალებაში თუ ორგანიზაციაში მუშაობს. მას ჯერ მიაკერებენ აგენტის სტატუსს და მერე თუ ის არ დარეგისტრირდება აგენტად, აუკრძალავენ საქმიანობას“, – ამბობს კორძაია.
მისი თქმით, ორივე შემთხვევაში აღნიშნული კანონი დამაზიანებელია როგორც სახელმწიფოსთვის, ასევე თითოეული მოქალაქისთვის.
„რადგან, თუ აგენტს დაიწერ, შენი რეპუტაცია საზოგადოების თვალში განადგურებულია და მისთვის ხდები მიუღებელი. ლევან ბერძენიშვილმა ახსნა, სხვათა შორის, ეს კარგად, როდესაც მას ასევე მიაკერეს რუსეთის აგენტის იარლიყი და წლები დასჭირდა, რომ ადამიანებს ეს დაევიწყებინათ. ზოგიერთი კი დღემდე ეძახის მას აგენტს.
მისი თქმით, გარდა ამისა, უამრავი კეთილი საქმე, რომელიც უცხოური დაფინანსებით კეთდება დღეს საქართველოში, იქნება ეს სამეცნიერო საქმიანობა, სამართლის განვითარება, კულტურა თუ სხვა, გაჩერდება, ადამიანები კი დაკარგავენ სამსახურს და, შესაბამისად, ხელფასსაც.
„ეს არის პროცესი, როდესაც ადამიანები სახელმწიფოდან მიდიან არა იმიტომ, რომ აქ თავს ვერ ირჩენენ და საჭმლის ფული არ აქვთ, არამედ იმიტომ, რომ საკუთარი თავის რეალიზაციის საშუალება არ ეძლევათ.
„უცხო ქვეყნის გავლენის აგენტის“ შესახებ კანონი მოქმედებს მხოლოდ რუსეთში და მიიღო უნგრეთმაც, რომელიც ვენეციის კომისიამ და სტრასბურგის სასამართლომ უარყოფითად შეაფასეს.
წყარო-ბათუმელები
Loading ...
