რა შემთხვევაში გამკაცრდება შეზღუდვები საქართველოში

პირველ რიგში, უკიდურესად მნიშვნელოვანია ტესტირების პროგრამის გაფართოება, როგორც ბიზნეს გარემოში, ისე დასახლებულ პუნქტებში, სადაც იკვეთება შემთხვევების მატება. მეორე, ძალიან მნიშვნელოვანი ღონისძიებაა უკვე დაწესებული რეგულაციების ზედმიწევნით აღსრულება, – ამის შესახებ ჯანდაცვის მინისტრის მოადგილემ, თამარ გაბუნიამ განაცხადა.

მისივე თქმით, უკიდურესად მნიშვნელოვანია დიდი თავყრილობების შეწყვეტა, რადგან ეს ძალიან დიდ რისკს წარმოადგენს.

„ჯერჯერობით ის ზომები, რომლებიც დაწესებულია, უნდა აღსრულდეს, მაგრამ ტენდენციები თუ ამგვარი მატებით გაგრძელდა, რა თქმა უნდა, მოგვიწევს დავუბრუნდეთ შეზღუდვების ისევ იმ მენიუს, რაც გამოვიარეთ და აქედან მობილობის შეზღუდვის გარკვეული მექანიზმები ისევ გამოვიყენოთ. ყველაფერი დამოკიდებული იქნება იმაზე, თუ რამდენად საზოგადოება დაიცავს უკვე დაწესებულ წესებს და ეს იქნება გარანტია, რომ არ დავუბრუნდეთ უფრო მკაცრ შეზღუდვებს“, – განაცხადა თამარ გაბუნიამ.

ბოლო 24 საათის განმავლობაში საქართველოში კორონავირუსი კიდევ 897 ადამიანს დაუდასტურდა.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით. 21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

საქართველოში „ასტრაზენეკათი“ ვაქცინაცია 2021 წლის 15 მარტიდან დაიწყო, „ფაიზერით“ კი 30 მარტიდან. ევროპის წამლის სააგენტოს ინფორმაციით, AstraZeneca-ს ვაქცინა უსაფრთხო და ეფექტური არჩევანია.